حكاية هاتشيسون.. وحش مصري جديد يقلب موازين التجارة الدولية

مصر بتعمل عظمة في التجارة الدولية والشهور الجاية فيه حدث كبير وعالمي هيحول مصر لمركز لوجستي وتجاري دولي.. إيه اللي هيحصل وإيه حكاية المشروع اللي هيغير موازين حركة التجارة في المنطقة.. تعالوا نعرف التفاصيل في الفيديو ده.

قطاع اللوجستيات في مصر واللي بيضم المواني وخطوط الملاحة والتجارة البرية والبحرية والطرق الدولية من اهم القطاعات اللي حصل فيها معجزة بكل معني الكلمة واللي خلى مصر تدخل عالم الكبار عالميا في تصنيفات المواني الضخمة والحديثة ومصر فيها ميزة الموقع الجغرافي وتحكمها في خطوط تجارة دولية حيوية واللي بتربط بين الشرق والغرب وبين الشرق وجنوب أوروبا وصولا للمحيطات من خلال قناة السويس.
ليه بنتكلم النهاردة تحديدا عن التجارة والمواني.. شوف حضرتك اللواء محمد خليل وده مدير مشروع تطوير ميناء السخنة، كشف عن تفاصيل الأعمال التنفيذية لمحطة حاويات هاتشيسون، التابعة للمينا ودي لو متعرفش فهي أكبر محطات الحاويات في مصر كلها، ومقرر تسليمها إلى المشغل الملاحي العالمي هاتشيسون وتحالف كوسكو وسي إم ايه العالميين لتطويرها قبل دخولها الخدمة.
وكشف المسئول إن المحطة هتكون جاهزة لاستقبال أول سفينة حاويات منتصف السنة الجاية 2025 وإن الأعمال شغالة بسرعة في المحطة للانتهاء الكامل منها في الوقت المحدد.
طيب ايه فايدة المحطة وبتفرق ايه عن بقية المينا.. شوف يافندم المحطة بتكون تابعة للمينا بشكل عام لكن بتكون مجهزة تجهيزات خاصة لاستقبال السفن العملاقة بطول 400 متر حضرتك متخيل طول السفينة يعني تقريبا نص كيلو متر ومش أي مواني تستقبل السفن العملاقة دي كمان المحطة بتكون مزودة بأحدث المعدات والأجهزة لسرعة شحن وتفريغ السفن الضخمة دي والمحطة هنا بتشتغل بردو 
ترانزيت للبضايع يعني تيجي السفن الضخمة تفرغ حمولتها وبعدين تيجي سفن تانية اصغر تشحن الحمولات وكل سفينة تروح بلد مختلف يعني المحطمة مركز للبضايع الدولية ومركز لجذب السفن الضخمة عالميا ومش أي مينا في العالم فيه محطة زي هاتشيسون أو محطة تحيا مصر في ميناء الاسكندرية اللي افتتحها الرئيس السيسي قبل كده.
ولو فاكرين الفريق كامل الوزير،  وزير النقل، قال من فترة إن الرئيس عبدالفتاح السيسي وجه بتطوير قطاع النقل البحري بالكامل وخد بالك من كلمة بالكامل دي لأنها مشروع ضخم جدا وهيحتاج مليارات الجنيهات لكن لابد منه لان مصر فعلا عندها أهم مواني في المنطقة وتطوير منظومة النقل البحري هيخدم بشكل كبير على بقية المواني المصرية وخطوط التجارة الدولية ولومتعرفش مثلا عندنا  ميناء السخنة دي بتعتبر ميناء محوري ورئيسي وأهم ميناء على البحر الأحمر.
طيب ايه اللي هتسفاده الدولة من تطوير المواني وعمل المحطات الدولية.. ببساطة لو معندكش بنية اساسية حديثة في المواني لاهتعرف تستورد ولا هتعرف تصدر ولا هتعرف تكسب من استضافة السفن العملاقة ولا هتجذب استثثمارات عالمية بتتعلق بالتجارة والنقل البحري وفيه شركات عالمية بتيجي تعمل مصانع عندك عشان تستفاد من المواني بتاعتك في التصدير للأسواق البعيدة عنها يعني كله بيزنس وعملة صعبة داخلة البلد.