مليارات ملهاش أخر.. الصين نازلة بتقلها في السوق المصري

اللي جاي حاجة تانية خالص مش مشروعات ولا اتفاقيات بس .. لكن شراكة شاملة واستثمارات ملهاش حدود في كل المجالات.. إيه اللي حصل في الصين وازاي السيسي قدر يحصل على أفضل النتائج في زيارته لبلاد التنين ويضرب الدولار في مقتل.. هنشوف التفاصيل كلها هنا

زي ما احنا عارفين الرئيس السيسي كان في الصين بدعوة خاصة من الرئيس الصيني لحضور منتدى التعاون العربي الصيني ومعروف كمان والكلام ده قلناه في بانكير قبل كده إن العلاقات بين الصين ومصر خاصة جدا وتاريخية وطول عمرها قايمة على التقدير بين أقدم حضارتين على وجه الأرض.
ورغم إن التعاون الاقتصادي والتكنولوجي قديم جدا بين مصر والصين لكن اللي جاي حاجة تانية تماما لأن اللي جاي شراكة اقتصادية قوية وتبادل تجاري فعال يعني اللي هيتعمل في الصين هيتنفذ في مصر ومعناه كمان إن هويس الاستثمارات الصينية هيفتح في مصر على اخره رغم إن فيه مشرعات صينية بالمليارات في مصر شغالة في مشروعات استراتيجية دلوقتي في قناة السويس وطربول والعاصمة الادارية لكم دي مش هيجي حاجة قدام مشروعات الشراكة الجديدة واللي هتعتمد على التصنيع المشترك ونقل التكنولوجيا والكيانات والبراندات الصينية العملاقة لمصر وتحويل مصر لمركز للصناعات الصينينة وتصديرها ده غير التعاون في مجال المواني وخطوط التجارة ضمن مشروع الطريق والحرير.

ورغم بردو إن القمة اللي عملها السيسي مع نظيره السيسي شهدت الاحتفال بترفيع العلاقات بين البلدين إلى مستوى الشراكة الاستراتيجية الشاملة واللي عدى على فكرتها 10 سنين لكن لأول مرة تبقي فيه خطط ومشروعات واستثمارات ضخمة على الارض  ومش بس استثمارات لكن فيه خطط حقيقة وشغالة دلوقتي مع الصين على توطين الصناعة ونقل التكنولوجي ودي بتقودها شركات صينية كبيرة واللي قعد معاهم الرئيس السيسي النهاردة.

وزي ما احنا عارفين الصين مهتمة جدا بمشورعات رفع مستوى البنية التحتية في قطاعات النقل والطاقة وتكنولوجيا المعلومات والسيارات والتعهيد في مصر.
كمان فيه هجوم صيني على المنطقة الاقتصادية لقناة السويس لتعزيز الاستثمار للشركات الصينية داخل مصر وفي الوقت نفسه بوابة لنفاذ الاستثمارات الصينية إلى العديد من دول العالم عبر موانئها الستة.

ليه الصين مصرة على الاستثمار في مصر.. أولا عشان مصر دولة مهمة في مبادرة الصين الطريق والحزام لاحياء خطوط التجارة الصيني القديم وفي نفس الوقت مصر عندها سوق ضخم وبوابة أفريقيا الرسمية والصين ليها مصالح في القاهرة وكمان لأن مصر مش بلد قليلة في الاقتصاد والاستثمار والتجارة وقدرت تحقق طفرة كبيرة في قطاع اللوجستيات وتحديدا  في إنشاء طرق برية وسكك حديدية جديدة ورفع الطاقة الاستيعابية للموانئ المصرية لتشجيع الاستثمار والصادرات من خلال اتفاقيات التجارة الحرة والأنظمة الاستثمارية المختلفة بخلاف نظام المناطق الحرة والمناطق الاستثمارية وعندها رؤية 2030  لزيادة الصادرات إلى 145 مليار دولار.
المهم كل اللي قلناه ده بيقول إن السيسي قدر يفتح خط تجارة وعملة بين الصين ومصر بعيد عن الدولار وقريب جدا هنسمع أخبار سارة جدا جدا عن ملف التعامل بالعملات الوطنية  في المعاملات الدولية وفي كمان تبادل العملات.