السبت 25 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

خبر صادم للمصريين بعد رمضان.. الكهرباء هتقطع ساعتين تاني والحل في إيد الحكومة

الخميس 04/أبريل/2024 - 04:00 ص
قطار كهربائي
قطار كهربائي



ايام قليلة بتفصلنا عن نهاية شهر رمضان المبارك، وللاسف مع نهايته بتنتهي وقف خطة تخفيف الأحمال علي الشبكة القومية للكهرباء واللي مجلس الوزراء اقر وقف العمل بها طول شهر رمضان لتقديم الفرصة للمواطنين للاستمتاع بالاجواء الرمضانية وإقامة الشعائر الدينية في الاضواء.. يا تري اللي هيحصل مع نهاية شهر رمضان بخصوص تخفيف الأحمال.. وقطع الكهرباء هيكون كام ساعة في اليوم

مع بداية اول ايام شهر رمضان، مجلس الوزراء قرر وقف العمل بخطة تخفيف الاحمال علي الشبكة القومية للكهرباء طوال شهر رمضان المبارك لمنح الفرصة للمواطنين للاستمتاع بالاجواء الرمضانية ولمة العلية علي مائدة الافطار وإقامة الشعائر الدينية وصلاة التراويح والتهجد في الاضواء، ولكن مجلس الوزراء اعلن ان وقف تنفيذ خطة تخفيف الأحمال هيكون خلال شهر رمضان بس.
طيب اية اللي هيحصل في خطة تخفيف الاحمال الكهربائية بعد شهر رمضان؟.
علشان نكون عارفين ان خطة وقف تخفيف الأحمال علي الشبكة القومية للكهرباء هي لشهر واحد بس وهو شهر رمضان، ولحد اللحظة مفيش اي قرارات جديدة بمد الخطة، والمؤكد أننا هنرجه للخطة القديمة اللي كنا شغالين عليها وهيا قطع الكهرباء لمدة ساعتين يوميا بدءا من الساعة 11 صباحا ولحد الساعة 5 المغرب، أو تصدر تعليمات جديدة من مجلس الوزراء بمد الخطة أو انتهائها نهائيا.
المستشار محمد الحمصاني، المتحدث الرسمي باسم مجلس الوزراء، أكد إن الدولة حاليا شغالة في خطة لوقف تخفيف الأحمال وانقطاع الكهرباء في أقرب فرصة ممكنة علي الرغم من الضغوط الكبيرة اللي علي الدولة من فرق دعم الكهرباء واللي وصل لـ 90 مليار جنيه السنة دي بسبب زيادة سعر المحروقات من السولار والمازوت اللازم لتشغيل محطات توليد الطاقة الكهربائية.
الدكتور مصطفي مدبولي رئيس الوزراء، قال في شهر يناير اللي فات، إن رفع أسعار الكهرباء هيقلص خسائر القطاع إلى 75 مليار جنيه مصري بدلا من 90 مليارا، وأن التكلفة الاجمالية اللي هتتحملها الدولة بتوصل 177 قرشا.

طيب اية اسباب لجوء الدولة لتطبيق جداول تخفيف الأحمال علي محافظات الجمهوية؟.
الحقيقة أن مصر فيها اكثر من سبب اي الي وجود وتطبيق خطة تخفيف الأحمال أولها نقص امدادات الوقود المورد لمحطات الإنتاج، وزيادة الاستهلاك اليومي للمواطنين من الطاقة الكهربائية، ده غير ارتفاع حالات سرقات التيار الكهربائي من المواطنين في المنازل ده غير حالات سرقة التيار في المواقف وغيرها من حالة السرقة اللي بنشوفها كل يوم، واخيرا ثبات أسعار الكهرباء وعدم تحريكها وفي المقابل اسعار المواد البترولية ارتفعت بشكل كبير واللي اغلب محطات توليد الكهرباء والطاقة شغالة عليهم من سولار ومازوت .

وزارة الكهرباء والطاقة المتجددة قالت أن السبب الاساسي لوجود خطة تخفيف الاحمال هو نقص كميات المازوت وإمدادات الغاز المورد لمحطات إنتاج الكهرباء غير ثابتة ومتغيرة في حالة وصول الكميات الكاملة لاحتياجات وحدات إنتاج الكهرباء هيختفي تخفيف الأحمال، بس الأعباء المالية على الدولة ستتضاعف .