ساعة الجد بدأت.. أول قرارات السيسي بعد الولاية الجديدة
ايه اول القرارات المتوقعة للرئيس السيسي في الولاية الجديدة وايه علاقة القرارات الجديدة بالاقتصاد والأسواق والحالة المعيشية للمواطنين.. تعالو نشوف إيه اللي ممكن يحصل
يوم التلات اللي فات كان يوم تاريخي في حياة مصر بعد حلف الرئيس السيسي لليمين الدستورية للولاية الجديدة واللي رسم الرئيس خطة عملها في خطابه قدام مجلس النواب وكان الملف الاقتصادي على رأس الأجندة للرئيس السيسي واللي متوقع يكون فيه قرارات رئاسية جديدة لترجمة فكر وخطة الرئيس اللي قالها في كلمته ومن بين القرارات دي هتكون إعادة تشكيل الحكومة واللي متوقع تكون حكومة اقتصادية في المقام الأول وفيها شخصيات اقتصادية كبيرة وعندها فكر مختلف للمرحلة الجاية.
الرئيس السيسي اتكلم عن الاقتصاد وقال إن الفترة الجاية هتكون مرحلة الانطلاقة الاقتصادية وبالتالي هيكون فيه قرارات لتشجيع الاستثمارات والتنمية المستدامة وتعظيم للموارد الدولارية من قناة السويس والسياحة والتصدير والاستثمارات المباشرة والتعاون الدولي الاقتصادي وكل بند من دول هيكون محتاج قرارات تذلل اي عقبات وتخترع محفزات جديدة في الشأن الاقتصادي واكيد الرئيس عنده خطة عمل واضحة وجاهزة في الملف الخطير ده وعنده قرارات وحلول لتحفيف المعاناة عن المواطنين ودي أولوية قصوى عند الرئيس ومفهاش هزار وهنشوف قرارات قوية في الجزئية دي بالذات.
من ساعة الرئيس السيسي ما حلف اليمين في العاصمة الإدارية الجديدة وبدأت مرحلة تانية وجديدة ومختلفة في كل الامور والقطاعات والمجالات وساعة الجد بدأت وفيه مجموعات عمل بترسم الست سنين اللي جايين في ولاية الرئيس اللي بدأت يوم التلات وهيكون فيها حسم قوي لكل المشاكل الاقتصادية اللي يتواجه البلد بسبب الظروف الدولية اللي حولينا واللي ليها آثار جانبية كتيرة دفع تمنها المواطن في النهاية.
الملف الزراعي والصناعي كمان ليه مساحة مهمة في خطة الرئيس الاقتصادية لمصر وهيكون فيه توجيهات بسرعة تنفيذ المشروعات قيد التنفيذ للاستفادة من دخلها مرحلة الإنتاج زي مشروع الدلتا الجديدة والمجمعات الصناعية العملاقة وغيرها من المشروعات اللي لسه بتتنفذ، كمان الرئيس بيحضر خطة لتطوير قطاعات العملة الصعبة زي قناة السويس واللي بيحصل فيها مشروع توسعة وتطوير دلوقتي علشان ترفع كفائتها واستيعابها لمزيد من السفن وكمان قطاع السياحة والاستثمار واللي الرئيس بيشرف عليه بشكل شخصي.
