السبت 25 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

ليه الدولار رجع يرفع تاني فى البنوك؟.. هنقولك اللي بيحصل فى الكواليس

الأربعاء 27/مارس/2024 - 01:20 ص
الدولار
الدولار

 

هو ليه الدولار رجع يرفع تانى فى البنوك؟ زليه بعد ما كان بيتراجع خد منحى صعودي فى الساعات الأخيرة؟ وهل هيكمل فى الارتفاع ولا ممكن ينزل الأيام الجاية؟ وايه علاقة اللى بيحصل فى سوق صرف العملات الأجنبية بالافراج عن البضايع المكدسة فى الموانيء؟

 

فى الساعات الأخيرة اتفاجيء عملاء البنوك اليوم بعودة سعر الدولار في البنك المركزي وعدة بنوك تانية للارتفاع من جديد بعد أكتر من أسبوعين من الهبوط المتواصل من وقت قرار السماح بتداول العملة الخضراء وفقا لآليات العرض والطلب ورفع الفائدة بمقدار 600 نقطة أساس يوم 6 مارس فى الاجتماع الاستثنائي للجنة السياسة النقدية بالبنك المركزي.

وسجل آخر تحديث لسعر الدولار اليوم في البنك المركزي المصري شراء: 47.34 جنيه وبيع: 47.48 جنيه بعد ما كان وصل الى مستوى 46 جنيه ونص الأيام اللى فاتت

طب ليه الدولار رجع يرفع تاني؟

وفقا لعدد كبير من الخبراء  فحركة تغيير منحنى الدولار للأعلى في البنوك بيدل على إتباع البنك المركزي لسعر الصرف المرن وفقا لآليات العرض والطلب اللى اعلن عنه وفقا لاتفاقه مع صندوق النقد الدولي ومن المتوقع عودة سعر الدولار للتراجع بعد وصول التدفقات الدولارية اللي تعهد بيها الشركاء وصندوق النقد الدولي والبنك الدولي والاتحاد الأوروبي.

وزي ما تم الاعلان مؤخرا تعهد شركاء مصر الدوليين بتقديم ما يقرب من 60 مليار دولار في شكل قروض ومنح واستثمارات وبناء عليه سمح البنك المركزي للجنيه بالانخفاض للمرة الأولى من أكتر من سنة وده جذب السيولة الأجنبية مرة تانية للسوق وبدأت الأموال الساخنة ترجع من جديد ومعاها كمان الاستثمارات الأجنبية المباشرة

وبتشمل الاتفاقيات الجديدة زيادة قرض صندوق النقد الدولي بقيمة 8 مليار دولار مع محادثات منفصلة جارية للحصول على قرض من صندوق النقد الدولي بقيمة 1.2 مليار دولار مرتبط بالاستدامة وحزمة مساعدات بقيمة 6 مليار دولار من البنك الدولي ز8 مليارات دولار في شكل منح وقروض واستثمارات من الاتحاد الأوروبي؛ واتفاق بقيمة 35 مليار دولار مع الإمارات يتكون من 11 مليار دولار لتخفيف عبء الديون و24 مليار دولار من الاستثمارات المباشرة بالاضافة الى 150 مليار دولار متوقع ضخها خلال فترة تنفيذ المشروع.

طب الكلام ده معناه ان الدولار هينخفض تانى الفترة الجاية؟

بنسبة كبيرة هيحصل انخفاض كبير فى سعر العملة الأمريكية مع وصول التدفقات الدولارية الضخمة دي لمصر ومتوقع وفقا لمعظم التقارير ان سعر الدولار يتراوح بين 40 الى 45 جنيه على أقصى تقدير وده هو تقريبا السعر العادل للدولار بعد القضاء على السوق السودا ومنع المضاربات