السبت 25 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

أصعب 5 سنين.. مطلوب 118 مليار دولار لسداد الديون

الأحد 24/مارس/2024 - 01:16 ص
الدولار
الدولار

ليه سنة 2024 هي الأصعب في ملف الديون الخارجية.. وياترى مطلوب كام  من مصر في السنين الخمسة اللي جايين وايه حكاية 118 مليار دولار المطلوبين من الحكومة.. تعالوا نشوف قصة الأرقام الصعبة دي

معروف من بعد 2011 البلد اقترضت أموال كتير عشان حالة الفوضى وشبه الانهيار اللي كانت فيها وجزء من الديون كان ودايع خليجية وبعد كورونا زاد الاقتراض بسبب ظروف العالم والاغلاق في مصر وبعدها جت الحرب الروسية الأوكرانية والعقوبات العالمية على اكبر بلد بيصدر حبوب ومواد غذائية في العالم وختمت بالحرب في غزة والصراع في البحر الأحمر ووصلت ذروة لديون لمصرية لحوالي 165 مليار دولار ومتوقع أن ينخفض إجمالي الدين الخارجي في السنة المالية 2023 – 2024 الى حوالي 157 مليار دولار.
وخلونا نقول إن الديون كانت من أهم الأسباب اللي ضغطت على الموازنة العامة للدولة في وقت كانت فيه السوق السودا مسيطرة على اسواق الصرف قبل تعويم الجنيه وتحرير سعر الدولار في البنوك ولدرجة إن فيه جهات دولية مالية كانت بتشكك في قدرة مصر على سداد ديونها وده كان ليه تأثير سلبي جدا على التصنيف الائتماني وتقارير السندات المصرية بالخارج وارتفاع تكلفة التأمين على الديون ولكن في نفس الوقت مصر ماتخلفتش أبدا في سداد الديون وبالعكس قدرت إنها تحول جزء مش قليل منها لاستثمارات زي ما حصل كده في صفقة راس الحكمة ومصر اتخلصت من 11 مليار دولار مرة واحدة ديون وبقت استثمارات هتيجيب عائد كمان للدولة المصرية.

طيب بمناسبة ديون مصر الخارجية.. ياترى كام المبلغ المطلوب سداده في الخمس سنين اللي جايين... شوف ياسيدي مطلبو من مصر تسدد أكتر من 92 مليار دولار ديون خارجية متوسطة وطويلة الأجل خلال السنوات الخمس الجاية، وده بخلاف ديون قصيرة الأجل بقيمة 25.7 مليار دولار، وده بعد استبعاد ودائع الإمارات، بحسب بيانات البنك المركزى المصرى، يعني بنتكلم في حوالي 118 مليار دولار مرة واحدة والمبالغ دي موزعة على الخمس سنين بتعتبر سنة 2024 اللي احنا فيها هي الرقم الصعب في ملف الديون لأن مصر مطلوب فيها تسدد 34 مليار دولار.. وفي سنة 2025 مصر هتكون مطالبة بسداد 18 مليار دولار..

أما في سنة 2026 المطلوب سداده هيكون حوالي 23 مليار دولار.. وفي سنة 2027 مصر هتسدد 12 مليار دولار ديون خارجية وفي سنة 2028 هيكون المطلوب سداده 5 مليار دولار .. وخلينا نقول لحضراتكم إن ملف الديون ده من أكتر الملفات اللي بتعاني منها مصر من سنين طويلة وأرهقت الاقتصاد بشدة وكانت سبب دائم في أزمة الدولار وإن 2024 هتكون سنة مهمة جدا في تحول ملف الديون وتخفيفها لأنها أكتر سنة هنسدد فيها والباقي هتكون أقساط خفيفة إلى حد ما.. وده غير إن الحكومة قدرت تحول جزء من الديون دي زي ماقلنا لاستثمارات زي ما حصل مع ألمانيا وايطاليا والإمارات واحتمال نسمع أخبار كويسة في ديون دول تانية مع مصر قريب جدا.