الأربعاء 17 أبريل 2024
رئيس التحرير
عمرو عامر
المشرف العام
عبدالعظيم حشيش
تحليل

مفاجاة سارة من الحكومة لحجاج بيت الله الحرام قبل مناسك الحج

الأربعاء 20/مارس/2024 - 03:22 ص
الحج
الحج

 

حج بيت الله الحرام واحدة من المناسك اللي كل الناس بتحرص عليها الا لمن استطاع اليه سبيلا، ولكن بعد قرار البنك المركزي بتحرير سعر صرف الجنية بشكل كامل والناس كلها بتسال هل اسعار برامج الحج هتزيد هيا كمان ولا لا... واية مصير الناس اللي دفعت فلوس برامج الحج لشركات السياحة او الوزارات التانية اللي بتنظم الحج
 


قرارات البنك المركزي بتحرير سعر صرف الجنية بشكل كامل قدام الدولار خلت في اسئلة كبيرة عند الناس عن اسعار كل الخدمات والسلع اللي بنحتاجها بشكل يومي في حياتنا، واحدة من الخدمات دي هي الحج، واللي اكيد عليه اسئلة كتيرة هل اسعاره هترتفع هيا كمان ولا هتزل ولا اية ظروفها.
علشان نكون عارفين من البداية كده أن الحج عندها هنا في مصر بتنظمه 3 جهات مختلفة اولهم حج قرعة الداخلية وده اللي بتنظمه وزارة الداخلية، ثاني الجهات اللي بتنظم الحج هيا وزارة التضامن الإجتماعي واللي بتنظم قرعة حج الجمعيات الاهلية، ثالث الجهات اللي بتنظم برامج الحج هيا وزارة السياحة والآثار واللي بتنظم حج قرعة الحج السياحي.
وعلشان نفهم الدنيا عاملة ازاي والاسعار هتزيد ولا لا، هنمشي معاكم علي برامج الحج اللي بتنظمها الـ3 جهات، وهنبدأ من قرعة وزارة الداخلية وقرعة حج الجمعيات الأهلية اللي بتنظمها وزارة التضامن الإجتماي واية مصير الناس اللي طالعة معاهم الحج السنة دي.
مبديا كده برامج حج قرعة الداخلية وقرعة حج الجمعيات الأهلية مش هتزيد جنية واحد بعد قرار البنك المركزي بتحرير سعر الجنية بشكل كامل قدام الدولار، خصوصا ان الجهات اللي بتنظم برامج الحج دي هي جهات مسئولة في الدولة، والدولة هيا اللي بتوفر ليهم الريال السعودي اللي هتحاجه وزارة الداخلية ووزارة التضامن الاجتماعي علشان تعاقدات سكن الحجاج والانتقالات في السعودية والوجبات والمشاعر في مني وعرفات وغيرها من الخدمات اللي هيحتاجها الحجاج طول ما هما هناك في السعودية.
نيجي بقي للحج السياحي واللي عليه الكلام كله، ومصير البرامج بتاعته اية.. خليني اقولكم في البداية كده ان تسعير برامج الحج السياحي والعمرة بيكون علي اساس سعر الريال في السوق السودا مش اسعارهم في البنك المركزي، علشان كده بتلاقي اسعارهم طالعة نازلة يعني هتلاقي سعر برنامج العمرة في شركة ما مختلف عن السعر في الشركة التانية .
طيب مصير اسعار برامج الحج السياحي اية بعد قرار البنك المركزي؟.
اللجنة العليا للحج والعمرة لما سعرت برامج الحج السياحي في ضوابط الحج السياحي كان علي اساس سعر بيع الريال السعودي في السوق السودا بـ 12جنية و 60 قرش، وده كان في الوقت ده اعلي من سعر بيع الريال في السوق السودا خصوصا ان اللجنة ووزارة السياحة والأثار كانوا عارفين ان في تحرير جديد لسعر صرف الجنية المصري في البنك المركزي وبناءه عليه سعروا برامج الحج بناء علي توقعات تحرير سعر الصرف الجديد.
مصادر بوزارة السياحة والآثار استبعدت اعلان وزارة السياحة والآثار زيادة اسعار برامج الحج السياحي في الايام اللي جاية خصوصا ان اغلب الشركات سددت رسوم الانتقالات والاقامة في الفنادق وكل الخدمات اللي هيتحاجها الحجاج في السعودية قبل قرار البنك المركزي بتحرير سعر صرف الجنية المصري، وبالتالي مفيش داعي لزيادة اسعار البرامج، خصوصا ان الزيادة الجديدة هتعمل مشاكل للمواطنين اللي دفعوا اسعار برامج الحج السياحي بشكل كامل لشركات السياحة .