الأربعاء 29 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

ليلة التعويم.. تفاصيل ساعات الرعب والصدمة في السوق السوداء

الجمعة 08/مارس/2024 - 01:30 ص
الدولار
الدولار


كان يوم أسود من قرن الخروب وخسارة وصدمة وانهيار.. ده كان اختصار المشهد بين تجار العملة في السوق السودا يوم الأربع اللي فات لما البنك المركزي ضرب ضربته القاضية وأعلن عن قرارات التعويم وتحرير سوق الصرف.
لغاية دلوقتي تجار العملة مش مصدقين اللي حصل في البنك المركزي ولا مصدقين إن سعر الدولار في البنك أعلى من السوق السودا وإن البلد حصل فيها تعويم فعلا والناس ماشية عادي وإن كل اللي خوفوا بيه الناس ولا حاجة منه حصلت.
بعد قرارات المركزي بدقايق انهارت السوق السودا حرفيا وانفض مولد المضاربات والاستغلال والتزوير والنصب وبقت سوق صرف واخدة واللي عاوز دولارات يروح ياخد اللي عاوزه من البنوك بسعر السوق.
صدمة تجار العملة جت من الخساير الضخمة اللي ضربتهم بعد فرمانات المركزي ولا هما دلوقتي عارفين يصرفوا الدولارات المخزنة عنديهم ولا قادرين يسيبوها ويخسروا اللي جمعوه طول شهور طويلة.
المشهد دلوقتي في السوق السودا خراب ومستعجل كمان ولسه اللي جاي اصعب لأن الداخلية مش هتسيب تاجر ضارب في الدولار إلا وهتجيبه ولسه رئيس الحكومة النهاردة موصي الأمن كويس جدا على التجار وشكلها هتكون ليلة كبيرة وهنشوف مفاجآت أكبر الأيام الجاية.