تأثير صفقة رأس الحكمة على اقتصاد مصر.. وايه الاستثمارت اللي هتدخل مصر؟

يا ترى ايه تاثير صفقة رأس الحكمة على اقتصاد مصر؟ وايه اللى هيحصل لأسعار السلع والمنتجات الفترة الجاية؟ وهل الدهب والدولار ممكن يتراجعوا لأسعارهم الطبيعية ولا لأ ؟ والأهم ايه الاستثمارات الأجنبية اللى هتدخل مصر الفترة الجاية؟ وهل السعودية وقطر ممكن يعملوا صفقات زيما الامارات عملت فى رأس الحكمة؟

هنبدأ بالسؤال الأهم  اللي بيشغل بال المصريين في قصة صفقة رأس الحكمة وهو تأثير الصفقة على الأسعار في الأسواق لأن الناس كل اللي يهمها إن الأسعار تنزل وتشتري بالمتاح وتأكل وتشرب وتبقي مستورة وغير كده لو قلت للمواطن من هنا لبكرة إن الصفقة دي اهم صفقة في التاريخ مش هيصدقك طالما الأسعار لسه غالية..
طبعا ومبدئيا نقدر نقول إن صفقة رأس الحكمة اصلا جاية عشان تقضي على ظاهرة نقص الدولار في السوق وتنهي حالة المضاربة عليه والسوق السوداء واللي هي اساسا سبب في ارتفاع كل الاسعار بجنون في كل الاسواق سواء في الدهب أو الحديد مواد البناء أو السلع أو الخدمات وكل ما تسأل حد حتي الحكومة تقولك عشان ارتفاع سعر الدولار وكل حجة التجار الفترة اللي فاتت في زيادة أسعار السلع بشكل جنوني معلش ياحضرت عشان الدولار غالي..
وزي ما احنا عارفين إن كل سوق كان بيسعر المنتجات بتاعته حسب سعر السوق السوداء وكان دولار الدهب مثلا فوق ال63 دولار الحديد 73 جنيه وكان دولار السلع 60 جنيه وعلشان كده كان فيه حالة فوضي كبيرة في البلد والأسواق وارتفاعات متتالية في السلع في اليوم الواحد واكتر من سعر في اكتر من منطقة وشفنا حالة الغلاء الفاحش.. 
طيب ياعم كانت حجة الحكومة في انقلات الاسواق كانت نقص الدولار.. ودلوقتي.. مفيش شك إن صفقة رأس الحكمة هيكون أو بقي فعلا ليها تأثير إيجابي كبير على الأسواق وإن الأسعار بدأت تنزل مع انهيار اسعار الدولار في السوق السودا وكانت البداية من سوق الدهب واللي انخفضت أسعاره بشكل كبيرة وسجل النهاردة جرام 21 حوالي 3250 جنيه من أعلى سعر وصله 4 جنيه في ذروة الأزمة ولسه الأسعار في سوق الدهب واحدة منحني هبوط 
في الأسواق العادية بدأت الأسعار تنزل لكن ببطء شديد وده لان السلع اللي في السوق أساسا التجار اشتروها بالسعر الغالي ولكن الايام الجاية متوقع تنزل وخاصة بعد تصريحات الحكومة واللي أكدت أن فيه اسعار نزلت فعلا وباقي اسعار باقي السلع هتنزل بقوة بعد قرار الإفراج عن كل البضائع في الجمارك وخاصة الأعلاف واللي بتأثر بشكل مباشر على أسعار اللحوم والدواجن وكانت سبب في ارتفاع أسعاره وإن بمجرد هبوط سعر العلف بعد دخول الكميات اللي في المواني اسعار اللحوم والدواجن هتنزل بقوة ودا كلام شعبة الدواجن والقصابين.
ونخلي بالنا نزول الأسعار هياخد شكل تدريجي عشان الناس ماتقولش فين اسعار زمان لأننا لينا شهور بنعاني من ارتفاع السلع ولغاية السوق ما يوصل لمرحلة التوازن هياخد مش اقل من شهرين تكون الحكومة سيطرت على الوضع وتكون استقرت أسعار الدولار عند حد معين ويكون عدى رمضان بكل مصاريفه واستهلاكه ويبدأ المواطن يحس إن فيه تغير وإن صفقة رأس الحكمة كانت سبب مهم في تغير ظروفه المعيشية.
وبالنسبة لسعر الدولار الأمريكي في مصر الأيام والشهور الجاية فنقدر نقول وداعاً للمضاربة تاني على الدولار ومش هيكون فيه سوق سودا تاني لأن صفقة رأس الحكمة ضخمة جدا وردمت الفجوة الدولارية اللي خلقت السوق السوداء نفسها ولأن اللي جاي بعد رأس الحكمة كله خير وملياارات الدولارات وفيه مشروعات عملاقة والمفاجأة بقى إن الجنيه سعره هيقفز قدام الجنيه ودا لأن الدولار سعره هينزل طول ما فيه وفرة من العملة الأمريكية وعرض وطلب وخلي بالك دا كله ولسه المركزي ما اتدخلش لحماية الجنيه وما اطلقش لسه مؤشر الجنيه مثلا اللي هيخلي السعر عادل وشفاف قدام باقي العملات الأجنبية والجنيه لما يتسعر بسعره الحقيق والعادل هنشوف الفرق الكبير في سعره قدام الدولار..
يعني ببساطة طول ما الدولار بينزل كل ما الأسعار ما هتنزل والجنيه قيمته بتزيد وكل اللي هيحصل بعد رأس الحكمة بيقول إن الدولار مش هيطلع تاني وإن الاسعار مش هتزيد بالشكل اللي شفناه وإن البلد هتبقي بخير بعد مابقت عندها خطة توطين صناعة وتصدير وترشيد استيراد وفكر بره الصندوق ورؤية واضحة هتوفر 300 مليار دولار في السنة وده اللي كان ناقص البلد إن يكون عندها رؤية وتخطيط لبكرة ول100 سنة قدام.

و ايه هي الاستثمارات الأجنبية المباشرة اللى هتدخل مصر الفترة الجاية؟

فى البداية أوعا تكون فاكر ان صفقة راس الحكمة دي مجرد حل بس لأزمة نقص العملة وتوفير السيولة الدولارية المطلوبة للوفاء بالتزمات مصر الخارجية .. لا خالص .. الصفقة دي هيكون ليها أبعاد ايجابية كبيرة على الاستثمار الجنبي المباشر فى مصر .. وخد بالك الصفقة شهادة ثقة فى اقتصاد مصر وفى انها مليانة بالفرص الاستثمارية الواعدة وده هيشجع كتير من صناديق الاستثمار الأجنبية على ضخ استثمارات بمليارات الدولارات خلال الفترة الجاية لأن صيت الصفقة سمع فى العالم كله وكل مؤسسات التمويل وبنوك الاستثمار بتتكلم عن ضخامة الرقم اللى هيدفع لمصر وانه فاق كل التوقعات لأن فى البداية الكلام كان عن 22 مليار دولار ومكنش معروف هل مصر هتحصلهم على طول ولا على دفعات طويلة الأجل لكن اللى حصل ان الرقم النهائي للصفقة وصل الى 35 مليار وكمان هيتم ضخهم فى البنك المركزي خلال شهرين على أقصى تقدير

وعشان كده فيه استثمارات أجنبية كتيرة هتدخل مصر الفترة الجاية وخلال فترة صغيرة هيتم الاعلان عن مشروعات ضخمة ممكن متكنش بحجم راس الحكمة لكنها كبيرة وكبيرة جدا كمان ورئيس الوزراء شاور لده فى مؤتمر اعلان الشراكة مع الامارات وبنسبة كبيرة السعودية وقطر هيكون ليهم نصيب من تورتة الاستثمارات الأجنبية المباشرة فى مصر خلال الفترة الجاية  

وخد بالك الاستثمار الأجنبى المباشر للدول اللى زيمصر وسيلة أفضل من اللجوء للاقتراض وبيساهم فى سد الفجوة بين الادخار والاستثمار، خصوصا فى ظل الشروط المجحفة للقروض الخارجية وتقلص المساعدات مع ملاحظة تراجع نسبة المساعدات الإنمائية المقدمة إلى للدول النامية .

وفى نهاية السنة اللى فاتت أعلن مركز المعلومات ودعم اتخاذ القرار التابع لمجلس الوزراء  عن ارتفاع صافى حجم الاستثمارات الأجنبية المباشرة الوافدة خلال العام المالى 2022/ 2023، لتصل إلى 10.039 مليار دولار مقابل 8.937 مليار دولار فى العام المالى 2021/ 2022 لكن كان فيه ملاحظة مهمة أنه أغلب الاستثمارات الأجنبية المباشرة منحصرة فى مجال الغاز والبترول بشكل رئيسى ورغم أهمية تلك الاستثمارات إلا أن فيه ضرورة لوجود تنوع فى طبيعة الاستثمارات وده اللى بتشتغل عليه الحكومة دلوقتى

طيب هل في مشروعات او مناطق ثانية هتطرحها مصر للاستثمار السياحي بعد منطقة رأس الحكمة؟.
طبعا، راس الحكمة دي كانت بداية خطة الاستثمارات الأجنبية المباشرة في مصر، والحكومة ممثلة في وزارة قطاع الأعمال اعلنت عن استعدادها لطرح منطقة رأس جميلة اللي موجودة علي ساحل البحر الأحمر بالقرب من شرم الشيخ، ومجلس الوزراء أعلن كمان استعداد الحكومة لطرح مناطق للاستثمار السياحي في مطروح والعلمين.
ولحد اللحظة اللي معانا معاكم فيها دلوقتي، السعودية هيا الاقرب للدخول في مشروع الاستثمار في منطقة رأس جميلة، خصوصا في ظل اتجاه الحكومة لتحويل ودايع الدول الاجنبية زي الامارات والسعودية وقطر والموجودة في البنك المركزي لاستثمارات مباشرة بتهدف لدخول عملات اجنبية للدولة وهتساهم في توفير فرص عمل مباشرة وغير مباشرة للمواطنين المصريين، يعني ضربنا عصفورين بحجز، شطبنا الديون اللي كانت علينا للدول دي، وحولنا الديون دي لاستثمارات مباشرة بالدولار في الاقتصاد الوطني وهنوفر من وراها كمان الآلآف فرص العمل للشباب .
طيب ليه الحكومة اخذت القرارات دي دلوقتي بطرح مناطق سياحية بالجمال ده علي البحرين الأحمر والمتوسط؟.
بص يا سيدي، الحكومة عارفة ان السياحة هيا الأمل الاساسي حاليا علشان الاقتصاد الوطني يرجع يقف علي رجله من ثاني، وعلشان كده مركزه كل شغلها علي قطاع السياحة وفي توجيهات عليا بقيام كل الوزارارت والهيئات بدورها الرئيسي لخدمة قطاع السياحة خصوصا ان في الوقت الحالي بقي هو العنصر الرئيسي في دخول عملات اجنبية بالدولار للخزينة المصرية، وده بعد تراجع عائدات قناة السويس بسبب هجمات الحوثيين علي السفن في البحر الأحمر، وتراجع تحويلات المصريين العاملين بالخارج لـ40% بسبب النشاط الغير عالي لحركة السوق السودا في الشهور اللي فاتت ورفع سعر بيع الدولار لـ70 جنيه بزيادة ما يعادل 40 جنيه عن سعره الرسمي بالبنوك.
حاليا الدولة بتستهدف من منطقة رأس الحكمة تحقيق 8 مليون سائح بالاضافة الي 30 مليون سائح بتستهدفهم الحكومة حتي عام 2028، وتحقيق 30 مليار دولار كإيرادات من القطاع يعني بعد طرح منطقة راس الحكمة للاستثمار السياحي الحكومة حاليا بتستهدف تحقيق 38 مليون سائح بدلا من 30، وبعد طرح مناطق جديدة زي رأس جميلة ومناطق في مطروح والعلمين الجديدة اكيد الخريطة السياحية في مصر هتتتغير تماما.

كل التحركات اللي بتعملها الدولة حاليا واللي لسه هتعملها مستقبلا، هدفها الاساسي اتاحة الدولار في البنوك الرسمية وتوفيره، بالتالي مش هيكون عندنا سوق سودا في التجارة بالعملات، خصوصا ان الدولة هتوفره بسعره الرسمي للمواطنين في البنوك الوطنية، يعني مفيش سببب هيدفع المواطنين علشان يشتري الدولار من السوق السودا خالص.