الأسعار هتنزل..لو عاوز دهب أو أجهزة كهربائية متشتريش دلوقتي

شفنا طوفان الأسعار اللي غرقت فيه الأسر المصرية طول شهور طويلة والغلا اللي وصل لكل السلع والخدمات والأسواق وأكتر حاجتين زادوا في الفترة دي هما الدهب والأجهزة الكهربائية لدرجة حصل ركود في سوق الأجهزة الكهربائية بسبب الغلاء الفاحش واللي بقى فوق احتمال أي أسرة أو عروسة بتجهز نفسها.
والدهب زي ماشفنا في الفترة اللي عدت إزاي وصل 4 الاف جنيه لجرام 21 اللي المصريين بيحبوا يشتروه وقد ايه الموضوع بقي صعب.
لكن يظهر إن الأيام الصعبة هتعدي خلاص والفرج جاي بعد صفقة راس الحكمة وهبوط الدولار في السوق السودا بشكل كبير واللي كان بداية وبشرة لهبوط كل الاسعار في كل السلع والبداية كانت سريعة في سوق الدهب واللي نزلت فيه الأسعار بشكل كببير على مدار اليومين اللي عدوا بعد توقيع صفقة راس الحكمة ولسه هينزل كمان وعشان كده مسئولي شعبة الدهب ووزارة التموين بينصحوا الناس اللي حابين يشتروا دهب إنهم يصبروا شوية لان الاسعار لسه هتنزل تاني في الصاغة مع استمرار هبوط الدولار.
كمان مسئولي شعبة الاجهزة الكهربائية والمنزلية نصحوا الأمهات والعرايس ما يشتروش دلوقتي ويستنوا حوالي شهر قبل مايروحو يشتروا لأن دي المدة اللي السوق هيوصل فيها لمرحلة حفض الأسعار بقوة بعد انهيار الدولار في السوق السودا.