الجمعة 19 أبريل 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

مهمة خاصة.. سر ظهور الغامض للملياردير هشام طلعت في مؤتمر رأس الحكمة

الأحد 25/فبراير/2024 - 03:40 ص
هشام طلعت مصطفى
هشام طلعت مصطفى


ياترى ايه سر ظهور رجل الأعمال والملياردير هشام طلعت في حفل توقيع صفقة رأس الحكمة التاريخية.. وايه سر علاقة هشام بالاماراتيين وايه علاقته بالمشروع.. أسئلة كتيرة هنعرفها مع بعض في الفيديو ده... خليكم معانا
 

 
العالم كله والأسواق العربية والدولية والبنوك الكبرى والمؤسسات المالية والاقتصادية في العالم تابعت تفاصيل الاعلان عن صفقة رأس الحكمة والمشروع الضخم اللي هيتم وبيتنفذ مباشرة في مصر والاهتمام العالمي ده سببه إن الصفقة جت مفاجأة كبيرة وفي وقت حساس وفي ذروة أزمة وإنه مكانش حد بيتوقع إن الحكومة المصرية شغالة في مفاوضات على صفقة العمر وعلى حل هينهي كل الأزمات بضربة استثمارية واحدة وفي نفس الوقت أدت درس لمؤسسات دولية عشان ما تتسرعش في الحكم على قوة وقدرة السوق المصري وفي نفس الزمان هتقطع الطريق على اي توقعات سلبية في المستقبل عن الاقتصاد الوطني وهتخلي كل المؤسسات المالية الدولية ووكالات التصنيف تراجع موقفها وتحرص لما تيجي تتكلم على مصر .

في حفل الإعلان عن تفاصيل أم الصفقات براس الحكمة لفت الإنتباه وجود رجل الأعمال الشهير المصري هشام طلعت مصطفى ودا خلى فيه تساؤل عن سر وجوده لكن اللي عارف هشام طلعت مش هيستغرب لانه بيعتبر الأب الروحي للتطوير العقاري الفاخر وهو اللي اخترع نظام الكمباوندات في مصر والمدن الخاصة والذكية وهو أكبر مطور عقاري في مصر وافريقيا وشركاته هي الأكبر في السوق المصري من حيت التنفيذ والتعدد والمبيعات وده بخلاف علاقاته المتميزة بدوائر الاقتصاد في الامارات وعلاقته الوطيدة بالسوق الاماراتي ورجال الدولة والاقتصاد في دولة الإمارات الشقيقة وليه شغل كتير معاهم وهما بيحبوه وبيثقوا في ذكائه وقدرات وقوة شركاته في مصر وخبرته العريضة في التطوير العقاري وتنفيذ مشروعات عقارية ضخمة في مصر زي الرحاب ومدينتي وغيرها عشرات المشروعات.

المنطق بيقول إن هشام طلعت هيكون لشركاته دور كبير في تنفيذ مشروع رأس الحكمة في الساحل الشمالي وإن الإماراتيين اختاروه عشان يكون مطور رئيسي في المشروعات اللي هام فورا ودي واحدة من ميزات كتير للمشروع وهي إن اللي هينفذه شركات مصرية بجانب شركات إماراتية وعالمية وهتوفر ملايين من فرص العمل والدخل للمصريين... كمان هشام طلعت مش قليل في السوق وبيعتبر من اذكي واقوي رجال الأعمال في المنطقة كلها وشخصية عالمية مرموقة في قطاع الاقتصاد العقاري ونجح يخلي مجموعة طلعت مصطفى من أكبر مطوري العقارات في العالم وطبيعي وجوده في حدث مهم زي الإعلان عن صفقة القرن الجديدة.
وزي ما احنا عارفين من حجم المشروع والاستثمارات اللي هتعدي ال35 مليار دولار إن القطاع العقاري في مصر هيشتغل بقوة والشركات المصرية هتنزل بتقلها ومصر فيها شركات عالمية زي شركات طلعت مصطفى والمقاولين العرب وحسن علام وغيرها واللي تقدر تنفذ أضخم المشروعات في العالم وليها سمعة دولية محترمة خلتها تنفذ مشروعات عملاقة في قارة أفريقيا وزي ما إحنا عارفين القطاع العقاري لما بيشتغل بيشغل الدولة كلها معاه لانه قاطرة الاقتصاد الفعلي ولأنه بيشغل وراه كل الصناعات زي صناعة الحديد والأسمنت ومواد البناء كلها والبويات والكابلات والمهمات الكهربائية والصرف الصحي ومصانع المواسير والأخشاب ومصانع الاسفلت والتعدين والصناعات الهندسية المختلفة ودي صناعات كلها هتكسب بشكل مباشر من مشروعات رأس الحكمة.