الخميس 22 فبراير 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

بعد انهيار الساعات الأخيرة.. إيه مصير دولار السوق السوداء

الثلاثاء 06/فبراير/2024 - 03:45 ص
الدولار
الدولار



شفنا امبارح ازاي الدولار في السوق السوداء هبط بشكل كبير ووصلت قيمة الهبوط 18 جنيه من أعلى سعر وصله الدولار وهو 73 وسعره دلوقتي 55 جنيه.. وده بيطرح أسئلة كتيرة من بينها مصير الدولار والمليارات اللي كانت في السوق الموازية ولو نزل اكتر أصحاب الدولارات هيعملوا فيها ايه.. كل ده هنجاوب عليه دلوقتي 
 

 
سوق الدولار زي اي سوق بصرف النظر إنه سوق غير مشروع ومجرم قانوناً وحتى التجار اللي فيه شبه تجار همهم الأول والأخير المكسب وطول ما فيه طلب على السلعة اللي في أيديهم سواء دولار أو غيره هيرفعوا سعرها ومكسبهم هيضاعف والعكس صحيح لما أي تاجر الطلب على سلعته بتقل اووي بيلجأ في العادة لخفض أسعاره زي ما حصل كده في السوق السودا للدولار الساعات الأخيرة أو أنه يتخلص منها بسرعة بمبدأ خسارة قريبة ولا مكسب بعيد.

طيب إيه الوضع بالنسبة لسوق الدولار وحجم التعاملات أو الدولارات اللي شغالة فيها وهي ضخمة جدا وفي مصادر مصرفية قدرتها باكتر من 50 مليار دولار.. شوف حضرتك تجار العملة زي ما قلنا قدامهم حل من تلاتة الاول ودا اللي بيحصل دلوقتي وهو تخفيض سعر الدولار عشان يتخلصوا منه وخسارتهم ما تزيدش أو الحل التاني أنهم يتخلصوا منها ويشغلوها في مشروعات وأنشطة مشروعة أو ما يعرف بغسل الأموال وفيه تجار فعلا اتجهوا لده ولو ملاحظين معانا الداخلية قبضت على تجار عملة كتير حاولوا يغسلوا أموالهم يعني ايه يغسلو أموالهم .. ده حضرتك مصطلح لجريمة وفيها أي تاجر في نشاط ممنوع زي تجارة العملة والمخدرات والتهريب لما الفلوس اكتر معاه مش بيقدر يحطها في البنوك لأنه هيتسأل على مصدرها من جهات رقابية خاصه لو مصدرها لا يتناسب مع أي نشاط شرعي ليه يعني لو واحد ظهرت معاه ملايين الجنيهات فجأة وهو مدرس وراح يحطها في البنك طبيعي الأجهزة تقوله من أين لك هذا  وعشان كده بيروح يغير الدولار لجنيه ويشغل الفلوس دي في أنشطة مشروعة يعني يعمل مشروع أو يشتري عقارات او يفتح معرض سيارات أو أجهزة منزلية وهكذا عشان يخبي فلوسه.

الحل التالت قدام تاجر العملة أنه يحتفظ بالدولار ات اللي جمعها من السوق الموازية لغاية ما سعرها يرفع تاني لكن الحل ده خطر وبيعرضه لخسارة أكيدة طول ما الدولار سعره بيقل..طيب أيه مصير الدولار الأيام الجاية.. شوف حضرتك كل المؤشرات بتقول إن الدولار هيستمر في النزول الفترة الجاية وده لأسباب كتير زي ماقلنا قبل كده منها الحملات الأمنية القوية على تجار العملة والقبض على حيتان كتير. ومصادرة أموالهم وتاني حاجة الكلام عن اتفاق مع صندوق النقد الدولي بخصوص القرض والكلام عن استثمارات ضخمة من الخليج وترشيد فاتورة الاستيراد واتفاقيات مبادلة العملة وهيكلة الديون وزيادة الحصيلة الدولارية من قطاعات اقتصاديه.