خطة صاعق الناموس..المؤبد لتجار العملة وقائمة سوداء بتتعمل في السر

إيه اللي بيحصل في الكواليس.. وايه اللي شغالين عليه رجال التشريع والقانون دلوقتي وايه علاقته بتجار العملة وايه حكاية القائمة السودا اللي بتتكتب دلوقتي بعد تحريات دقيقة وايه خطة صاعق الناموس اللي هتنهي أزمة الدولار .. تفاصيل كتير ومفاجآت من العيار التقيل هنعرفها مع بعض خليكم معانا للآخر
 

سنة كاملة من فبراير اللي فات مع بداية الأزمة الروسية الأوكرانية ومصر عايشة في أزمة دولار لأسباب كتيرة جدا وكلها أزمات خارجية ومصيبة وحلت على راس البلد، لأن الحرب اللي في اخر الدنيا ويفصلنا بيها بحور وصحرى وقارات كانت السبب إن مصر تخسر 22 مليار دولار في كام يوم وهي اللي بيسموها الأموال الساخنة وهي الدولارات اللي بتهرب من الأسواق في ساعة الأزمات والكلام ده كلنا عارفين.

ولو جت على 22 مليار دولار مكنش هيكون فيه أزمة اطلاقا لأن الدولة كانت هتعرف تتدبرهم وتردم الفجوة اللي حصلت في سوق الصرف لكن للاسف ظهرت السوق السودا للدولار واللي استغلت الوضع أسوأ استغلال واتحولت الورقة الخضرا من مجرد عملة للتداول لورقة يانصيب وعليها مزاد ومضاربات ولأن المكاسب كبيرة تجار العملة ودخلت عليهم عصابات الممنوعات والتجارة المشبوهة ووسعت سوق العملة اللي بتتعامل في الضلمة ودخل عليها كمان تجار الدهب وحيتان التوزيع والجملة من تجار البقالة ودخلت فيها كمان جهات مشبوهة وجماعات محظورة واهو سوق سداح مداح وكله بيتاجر لغرض عنده اللي عاوز يكسب من فرق السعر واللي عاوز يغسل ويداري فلوسه الحرام ويشتري دولار واللي بيشتري عشان يخزن واللي بيضارب ويعلي في السعر عشان يحرج الحكومة والنظام... لغاية ما بقت سوق متوحشة.

الحكومة ومعاها البنك المركزي ماسكتش وعلى مدار الأزمة وهي بتتعامل بحزم واشتغلوا في طريقين الاول توفير الدولار بطرق مختلفة زي  مبادرات السيارات والدهب والأراضي للمصريين بالخارج وطريق ملاحقة تجار العملة ورغم أنه اتقبض على تجار كتير لكن المكسب وضعف القوانين كانوا السببين في استمرار السوق السودا للدولار وحتي لو اتقبض عليه والفلوس اتصادرت محامي شاطر يطلعه من اول جلسه لأن القوانين زي ما قلنا ضعيفة.

ليه كل المقدمة دي والحكاوي في حاجات معروفة.. شوف حضرتك اللي مش معروف إنه فيه دلوقتي خطة بتتظبط عشان كل اللي تاجر في العملة يجي وبتقبض عليه وفيه ناس من أهل القانون والاقتصاد دلوقتي شغالين على قوانين جديدة لمعاقبة تجار العملة واللي جريمتهم بقت من أخطر الجرايم دلوقتي لأنها يتهدد الأمن القومي والسلام الداخلي هشان تجار السوق الموازية هما السبب في ارتفاع أسعار كل حاجة.
المعلومات المتاحة بتقول إن عقوبة الاتجار في النقد الأجنبي هتوصل المؤبد ومصادرة كل أملاكه حتي لو كانت مش عملة.. مش كده وبس...... لا ده  القانون الجديد هيستبعد كمان حالات التلبس واللي كان بيشترطها عشان يقبض على تاجر العملة متلبس بالدولارات وهيبقي كله بالتحريات والأدلة والقرائن عشان مفيش تاجر يستفاد من الدولار وااومن الصفقات اللي عملها ويهرب من العدالة وما يدفعش تمن جريمته في حق الملايين من الناس 
خلص الكلام.. لا لسه.. دلوقتي فيه شغل عالي بيتعمل على التجار وهي قائمة سودا لكل الحيتان الكبار في السوق واللي بيهربوا من المحاسبة لأنهم عارفين تفاصيل القانون القديم، والقايمة دي زي ما قلنا بتتعمل على نار ه هادية عشان كله هيجي قدام القاضي ويتحاكم.. والأجهزة بتراقب كل تاجر دلوقتي وبتابعه وتحطه تحت المراقبة 24 ساعة وسايبة التجار يظهروا عشان تعرف كل شركائهم ويجيبوا بعض ودي فكرة صاعق الناموس اللي بيقرب على النار عشان الدفا وفجأة بيوقع ويموت.