الحكومة فين؟.. الأسعار تخرج عن السيطرة والمواطن يدخل المفرمة
في أي بلد فى الدنيا المهمة الأولى للحكومة هي ضبط الأسواق ومنع المضاربة والاحتكار وتخزين السلع لكن فى مصر الحكومة نايمة فى العسل وسايبة الناس فريسة للتجار ومعدومي الضمير وده خلا أسعار السلع بما فيها السلع الأساسية والاستراتيجية تسجل أرقام ومستويات محصلتش قبل كده.. وكفاية أزمات الرز والسكر ومن قبلهم البصل والطاطم وسلع تانية كتيرة بقا محدش يقدر يشتريها غير الناس المقتدرة أم البسطاء ومحدودي الدخل فربنا يكون فى عونهم ويتولاهم برحمته.. لكن السؤال هي الحكومة فين من اللى بيحصل ؟ وازاى سايبة الأسواق تعوم فى بحر من الفوضى ؟ وليه ما اتدخلتش للقضاء على أزمات فى سلع مهمة؟
من غير لف ودوران وبوضوح الحكومة فشلت فشل ذريع فى التعامل مع ملف الأزمات الاقتصادية اللى مصر بتعانى منها فى اخر سنتين.. ومش محتاج مجهود ولا دليل على ان حكومة الدكتور مدبولى فشلت فى احكام قبضتها على السواق وان اسعار السلع زادت ضعفين وتلاتة وعشان كده فيه مطالب قوية فى البرلمان ومن حركات سياسية فى تشكيل حكومة جديدة يكون قوامها من رجال المال والبنوك للتعامل مع الأزمات اللى بتواجهها مصر والمتوقع انها تتصاعد لو مفيش افكار من بره الصندوق
الحكومة أطلقت من أيام مبادرة خفض أسعار السلع الغذائية الأساسية بهدف خلق وفرة في مختلف السلع بالأسواق بشكل يساهم في انخفاض الأسعار خصوصا السلع الغذائية في محاولة للتخفيف قدر الإمكان من وطأة التداعيات السلبية للأزمات العالمية لكن للأسف مبادرة الحكومة مكنش ليها أى مرود على الأسواق وده لأن مفيش اى التزام ببنود المبادرة من التجار اللي ضربوا بتعليمات الحكومة عرض الحائط وبيبعوا السلع بأكتر بكتير من الأسعار اللي حددها مجلس الوزراء.
طب الأجهزة الرقابية فين من اللى بيحصل ؟
للأسف جهاز مهم زي جهاز حماية المستهلك تخلى عن دوره الأساسي واكتفى بنشر البيانات والتحذيرفقط لكن على ارض الواقع الجهاز مبيعملش حاجة اصلا ولو حصل ورحت اشتكيت هيقولك سيب بياناتك وهنبقا نتواصل معاك .. وموت يا حمار لا حد هيسأل ولا حد هيهتم
طب هل التسعيرة الجبرية ممكن تكون حل للي بيحصل ؟
مصر بتطبق سياسة السوق الحر والسياسة دي صعب جدا معاه تطبيق التسعيرة الجبرية والصح ان الحكومة تشتغل وتشوف ايه السلع اللى فيها عجز أو نقص وتوفرها سواء محليا أو حتى عن طريق الاستيراد لضبط السوق ووقف المضاربات على السلع الاستراتيجية بالاضافة كمان لاحكام الرقابة على الأسواق والتصدي لأى محاولات أو مماسات غير قانونية والضرب بايد من حديد على اى شخص تسول ليه نفسه التلاعب فى قوت المصريين
طب هل الأسعار هتفضل تزيد الأيام الجاية ولا ممكن الدنيا تهدا شوية؟
الحكومة لو اتحركت وخدت قرارات جريئة خصوصا فى سوق الصرف ممكن الدنيا تهجا شوية لأن نقص الدولار عامل أزمة كبيرة فى البلد ومخلى كل السلع حتى السلع غير المستوردة بتقفز قفزات جنونية ومن غير السيطرة على سعر الدولار هتفضل الأسعار تزيد .. بس فيه حلول عاجلة ممكن الحكومة تعملها زي السيطرة على الاسواق وتوفير كميات كبيرة من السلع فى منافذ الجمعيات الاستهلاكية بالاضافة لحلول تانية كتير لو فيه رغبة فى انهاء الأزمة
