وصلت الي 56 مليار جنيه.. أرباح البنك المركزي بتيجي منين
حقق البنك المركزي صافى ربح كبير خلال اول 5 شهور من السنة المالية الجديدة اللي بتبدأ في مصر من أول شهر يوليو وتنتهي في آخر يونيو من العام اللي بعده، ووصلت أرباح البنك المركزي لـ 56.2 مليار جنيه بنهاية نوفمبر لعام 2023 مقابل نحو 44.7 مليار بنهاية أكتوبر الماضى بنسبة زيادة وصلت %25.5.... يا تري اية هيا سبب الأرباح دي واية هيا مصادر أموال البنك المركزي واية هيا الأصول اللي بيمتلكها .
علي مدار 6 سنوات تراجعت أرباح البنك المركزي نتيجة دعمه للبنوك المصرية من خلال المبادرات الخاصة بقطاعات الدولة زي السياحة والصناعة والزراعة والمقاولات، وكان بيتحمل الفارق فى العائد لحد ما صدر قرار مجلس الوزراء بتوجيه مسئولية 5 مبادرات لوزارة المالية ووصلت خسائر البنك المركزي وفقا للقوائم المالية المجمعة فى آخر 6 سنوات الي 343.4 مليار جنيه في الفترة من يوليو 2017 إلى يونيو 2023.
بداية انطلاقه البنك المركزي والتحول لتحقيق الارباح كانت بعد نقل تبعيه 5 مبادرات الحكومية لوزارة المالية واللي كان البنك المركزي بيقدم فيها قروض بفوائد منخفضة لمبادرات الحكومة لدعم قطاعات الدولة، وبدأ البنك يحقق إيرادات من الأصول زي المساهمة فى رؤوس أموال مؤسسات تمويل دولية مالية بمبلغ 20.2 مليار جنيه، ورؤوس أموال شركات تابعة وشقيقة بمبلغ 46 مليار، وقروض وودائع للبنوك بحوالى 316 مليار وبعض الأصول الأخرى المملوكة للبنك .
خليني اقولك علي حاجة مهمة أن ابرز مصادر أرباح البنك المركزي جت من بيع العملات الأجنبية للبنوك من خلال الإنتربنك وهو نظام نقدى بتلتزم بيه البنوك الموجودة فى الدول اللي بطبقه لتحديد حجم السيولة الدولارية المتوفرة ليها، ده غير امتلاك البنك المركزي لحصص فى بعض المصارف، والاستثمار فى الاصول زي السندات الحكومية والعملات الأجنبية، وتقديم الخدمات المالية للحكومة.
حسب خبراء البنوك المركزي حقق أرباحه من عده مصادر ابرزها بيع العملات الأجنبية للبنوك من خلال “الإنتربنك”، وتقديم قروض للبنوك والحكومة، وامتلاكه حصص فى البنوك المصرية.
وفيه رأي تاني، بيقول ان فرق الفايدة اللي بيقدمه البنك المركزي للبنوك التجارية احد اهم أسباب تحقيق البنوك المركزية للأرباح وهو الفرق بين معدل الفائدة اللى بيدفعه للودائع واللى بيحصل عليه من القروض، ده غير الاستثمارات في الأصول المالية زي السندات الحكومية والعملات الأجنبية.
وعادة تحقيق الأرباح من الاستثمارات بيعتمد على أداء السوق المالى، وان سياسة المخاطر المشددة اللي اتبعها البنك المركزى فى الفترة اللي فاتت وتطوير الخدمات المالية وتوسيع نطاق المستفيدين منها واستخدام التكنولوجيا والابتكار فى تقديم الخدمات دي ادي لزيادة الأرباح وضمان الاستدامة المالية .
الخبراء المصرفيون أكدوا ان المبادرات اللي قدمها البنك المركزي للبنوك التجارية زي مبادرة التمويل العقاري وتمويل المشروعات الصغيرة ومبادرات دعم السياحة اللي فيها تم توفير السيولة المالية للتمويل العقارى للمواطنين بنسبة فائدة أقل من البنك المركزي عن النسبة اللي بيتحملها البنك التجارى .
