الأحد 26 مايو 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

شلل وارتباك واضح جدا.. إيه اللى حصل في السوق السوداء بعد تثبيت الفايدة؟

الأحد 24/ديسمبر/2023 - 01:01 ص
الدولار
الدولار

 
يا ترى ايه اللى حصل في السوق السودا للدولار بعد قرار البنك المركزي بتثبيت أسعار الفايدة في اجتماعه الأخير؟ وهل القرار كان مفاجئ للسوق السودا ولا كان متوقع؟ وايه علاقة القرار بمفاوضات مصر مع صندوق النقد الدولى على زيادة قرض ال 3 مليار دولار ؟ وايه موقف تخفيض قيمة العملة في السنة الجديدة ؟ وايه علاقة ده كل بتحريك ملف الطروحات الحكومية والاعلان عن تخارج الدولة من عدد من الشركات ؟ 
 


بعد ساعات من تثبيت "المركزي" لسعر الفائدة على الإيداع والاقراض للمرة التالتة على التوالي شهد سعر الدولار في السوق الموازية تحركات طفيفة حسب عدد من المتعاملين في السوق لكن رغم كده فيه شلل وارتباك واضح بيضرب تجار العملة والمضاربين على الدولار خصوصا وانهم اتفاجئوا من قرار المركزي وكانوا متوقعين رفع أسعار الفايدة على الأقل 300 نقطة أساس وفيه ناس كتير منهم كانوا بيروجوا ان الدولار بعد قرار رفع الفايدة هيقفز الى 55 جنيه ويمكن ده اللى خلا عمليات تنفيذ بيع وشراء العملة في السوق الموازية تراجعت بشكل ملحوظ في الكام ساعة الأخيرة.
لكن المؤكد ان سعر دولار السوق السودا مش هيتراجع بعد قرار تثبيت الفايدة وحاليا الأنظار هتبدأ تتجه لاجتماع لجنة السياسة النقدية في فبراير الجاى واللى بنسبة كبيرة هيشهد أكبر زيادة في أسعار الفايدة خصوصا لو استمر التضخم في ارتفاعه وفشلت كل الإجراءات في احتواء ارتفاعات الأسعار.
طب ايه علاقة قرار تثبيت الفايدة بالفاوضات الجارية بين مصر ومسئولى صندوق النقد؟ 
زي ما كلنا عارفين فيها نقاشات بتجرى حاليا بين الحكومة وصندوق النقد وتم تسريب كتير من الاخبار اللى بتؤكد ان الصندوق هيرفع اجمالى التمويل المقدم لمصر من من 3 الى 6 مليار دولار وده بعد ادراك مسئولي الصندوق لقيمة ومكانة مصر في المنطقة خصوصا بعد الحرب على غزة وموقف الرئيس القوى الرافض لتهجير الفلسطينين الى سيناء وكمان دور مصر المهم في ادخال المساعدات الإنسانية لأهالى قطاع غزة والتنسيق في ده مع معظم عواصم العالم ومن هنا بقى مطلب أساسي الحفاظ على اقتصاد مصر ووقف التدهور اللى بيحصل وشفنا تغير واضح في لهجة الصندوق والتخلى عن بعض شروطه المجحفة وعلى راسها تحرير سعر الصرف بالكامل 
بس طبعا الماوضات مش سهلة زي ما ناس كتير فاهمة لأن فيه خلافات في وجهات النظر حوالين طريقة تنفيذ برنامج الإصلاح وزي ما بيقولوا كل شيخ وليه طريقة الصندوق طالب حاجات تتعمل بطريقة معينة والحكومة شايفة طرق تانية افضل لكن دي كلها خلافات بسيطة ويمكن تجاوزها ان شاء الله 
يعنى كده مفيش تعويم ؟ 
التعويم زي ما قولنا لحضراتكم قبل كده مش هيحصل الا في حالة واحدة بس وهى ان البنك المركزي يجمع سيولة دولارية كبيرة كغطاء لأى خفض محتمل في قيمة العملة وده لسه محصلش لحد دلوقتى صحيح فيه محاولات وفيه تحركات بتحصل لجمع المبالغ المطلوبة 
وايه علاقة ده كل بتحريك ملف الطروحات الحكومية والاعلان عن تخارج الدولة من عدد من الشركات ؟
ملف الطروحات الحكومية واحد من أهم الملفات اللى الحكومة بتعول عليها لجمع سيولة دولارية وفعلا رئيس الوزراء أعلن ان الحكومة جمعت اكتر من 5 مليار دولار من عمليات تخارج حصلت من بعض الشركات المملوكة للدولة وكان اخرها حصص في 7 فنادق تاريخية تم بيعها لمجموعة طلعت مصطفى.