هو لية الدولة ماتجبرش التجار على أسعار المنتجات والسلع؟

طالما الأسعار بتتفاوت بشكل كبير اوي.. طيب لية الدولة ماتعملش تسعيرة إجبارية على المنتجات والسلع.. وتوقف بقى مسألة التفاوت الكبير في الأسعار.. وهل الدولة ينفع تعمل كدا ولا لأ؟

ناس كتير بطالب الحكومة بتحديد تسعيرة جبرية على أسعار المنتجات والسلع.. طالما الموضوع بقى سداح مداح والتجار يعلوا اللي هما عايزينه وكدا.

بص يا فندم.. قولا واحدا كدا الدولة مينفعش تعمل التسعيرة الجبرية.. لأن الحكومة فى اي دولة بتحاول تنتقل لسوق حديث مينفعش تتدخل فى حركة السوق وتحدد وتفرض اسعار علي اي تاجر او مستثمر او مصنع او منتج.

(مثال : لو السكر فى السوق بيتباع ما بين 12 ج ل 20 ج بمختلف الانواع والشركات.. مينفعش الحكومة تقول لمستثمر ما : بيعه ب5 ج .. الكلام دة عيب وحرام , الكلام دة يتعمل فى كوريا الشمالية مثلا.. بس مش هنا.

وعشان كدة الحكومة عمرها ما هتعمل كدة مهما صدر تصريحات رسمية انها بتفكر او بتدرس دة.

السؤال الأهم.. اومال ايه دور الحكومة فى قصة الاسعار؟

فيه دور مباشر ودور غير مباشر .. الدور المباشر..  هو أن الحكومات فى اي حتة وفى اي زمن ومن امريكا لافغانستان.  عليها دور اجتماعي مهم لمساندة فئة المواطنين الاكثر ضعفا. وهو دة اللى اسمه الدعم.. وهو بالمناسبة له 13 نوع فى الموازنة العامة ..  وقيمته الاجمالية = 480 مليار جنيه.

ورغم ضخامة المبلغ الا انه مش بيكفينا ولا بيحل كل المشاكل. وهنا فى مصر الدعم الاهم علي الاطلاق هو الدعم التمويني..  والدعم التمويني له منافذ بيتباع فيها سلع باقل من سعرها او اقل من تكلفتها الحقيقية.

والمنافذ دى هى المكان الوحيد اللى من حق الحكومة تفرض فيه سعر معين علي التاجر المتعاقد مع وزارة التموين..  لانها بتدعم السعر او الفارق دة من موازنتها العامة لتقديم السلعة بسعر ارخص لصالح المواطن الغير قادر علي شراءها بالسعر الحر او التكلفة الحقيقية.

(مثال : كيلو السكر الحكومة بتشتريه من الشركات او بتنتجه فى مصانعها العامة بتكلفة تقريبية مثلا مثلا يعني 12 جنيه.. وبتبيعه للناس اللى معاهم بطاقات تموينية ب8، يعني بتتحمل 4 جنيه من موازنتها لتقديمه للمواطن بسعر اقل من السعر الحر.

إنما  الدور الغير مباشر .. بيتمثل فى الحكومة تحمب المنافسة وتشجعها وتجذب مزيد من المصنعين والمنتجين والمستثمرين للدخول فى السوق.. لأن المنافسة هي اللي هتنزل السعر.