الأيام الأخيرة للدولار.. هروب المضاربين واختفاء مافيا العملة

 
قولنا لحضراتكم قبل كده كتير ان اللى بيحصل في السوق السودا للعملة مش طبيعي ابدا.. وأكدنالكم ان سعر الدولار مش طبيعي وان فيه مضاربات بتتم على العملة الأمريكية وان دخول السوق الموازية مغامرة كبيرة وفخ ممكن يتسبب في خسارة اى حد لمدخراته ناهيك أصلا عن ان السوق السودا مجرمة والتعامل فيها مش قانوني.. واللي حذرنا منه بيتحقق دلوقتي وكل اللى غامر بفلوسه حاطط ايده على قلبه في انتظار ايه اللى ممكن يحصل الأيام الجاية.. فيا ترى ايه اللى بيحصل في كواليس سوق الصرف ؟ وليه سعر دولار السوق السود انهار في اخر كام يوم وخسر حوالي 10 جنيه من قيمته؟ وهل اللى بيحصل معناه ان ازمة الدولار في طريقها للنهاية؟
 

 
في آخر 48 ساعة شهد سعر الدولار في السوق السوداء تراجع ملحوظ واتكبد المضاربين خسائر خلال الأيام اللى فات مع تراجع سعر الدولار بالسوق الموازية.. واتراجع سعر الدولار في السوق السودا إلى 42 جنيه بدلا من 52 جنيه اللي كان وصل ليها الدولار في الوقت اللي بتقوم فيه الحكومة حاليا بتضييق الخناق على مافيا الدولار والمضاربين على العملة.
التراجع اللى حصل في السوق السودا واختفاء المضاربين وهروب عد من تجار العملة ليه أسباب كتيرة أهمها طبعا الإعلان عن تجديد أكتر من وديعة خليجية منها ودائع للامارات وودائع كويتية وسعودية بالإضافة كمان الى اعلان الاتحاد الأوربي عن منح مصر حوالى 10 مليار دولار بهدف توسيع الشراكة مع الحكومة المصرية وزيادة النعاون في ملفات اقتصادية وملف تانى مهم هو ملف الهجرة غير الشرعية. 
مش بس كده مديرة صندوق النقد التقت الرئيس السيسي على هامش المشاركة في مؤتمر المناخ اللى بتستضيفه السنة دي دولة الامارات العربية المتحدة .. وبعد اللقاء ده أثنت مديرة صندوق النقد على دور مصر المهم في المنطقة والتزامها باستقرار الاقتصاد الكلي في بيئة مليئة بالتحديات. وأكدت ان إلى الصندوق بيدعم بقوة جهود الإصلاح في مصر.
وفي نفس الوقت أكد المتحدث الرسمي باسم رئاسة الجمهورية ان اللقاء تناول استعراض أوجه العلاقات بين مصر وصندوق النقد الدولي في ضوء برنامج التعاون القائم لاستكمال تنفيذ الإصلاح الاقتصادي المصري وقال ان الرئيس السيسي أعرب عن التقدير للشراكة المثمرة بين مصر والصندوق وأكد حرص الحكومة المصرية على استمرارها.

كمان البنك المركزي بدأ تحركات مهمة من اجل توفير سيولة دولارية واقتحم ملف مهم هو ملف تحويلات المصريين في الخارج وبيحاول يجذب المصريين بالخارج مرة تانية الى تحويل فلوسهم عبر البنوك وفتح مفاوضات مع البنوك المركزية في السعودية والامارات والأردن من اجل اعفاء تحويلات المصريين من أي رسوم ومن خلال تطبيق انستاباى اللى بيشتغل باشراف مباشر من البنك المركزي بالإضافة الى اتفاقية مبادلة عملات هتتم مع السعودية والامرات وعدد تانى من الدول العربية والأجنبية هيكون ليها دور مهم وقوى في زيادة المعروض من العملة الأمريكية.. والقاعدة في سوق العملات معروفة كل ما زاد المعروض كل ما قل سعر الدولار والعكس صحيح