الأسعار نزلت تخزن ولا تشتري على قدك
بعد شهور طويلة من ارتفاع أسعار السلع بشكل غير مسبوق بسبب اللي بيحصل حوالينا في العالم وبسبب بردو جشع التجار قررت الحكومة تعمل مبادرة جادة لخفض أسعار عدد من السلع الأساسية واللي تهم المواطن والأسر بشكل كبير زي السكر والزيت والالبان والجبن والعدس.. انت كمواطن تعمل ايه في الوقت دا .. وهل تشتري وتخزن ولا تشتري غة على قدك.
طبيعي لما أسعار السلع تنزل أول حاجة هتعملها ست البيت إنها تنزل تشتري بكل الفلوس اللي معاها السلع وتخزنها عشان لو رفعت تاني بعد المبادرة ما بتخلص.. لكن دا تصرف اقتصادي مش سليم ودا لأسباب كتير أولها إن المبادرة لسه مكملة وهتتمد زي ما قالت الحكومة ولو انت اشتريت بكميات كبيرة المبادرة هنفشل لأن التجار مش هيقدرو يسيطروا على الأسعار وقتها بسبب الطلب الكبير على السلع وكمان لأن غيرك جائز مش معاه فلوس يشتري دلوقتي ومش هيعرف يشتري لما انت تخزن السلع.
العقل بيقول انك تشتري على قدك عشان غيرك يلاقي وعشان السلع تبقى متوفرة في الاسواق ومتقلقش ويرجع سعرها يرفع تاني وكمان فيه فقرا وناس محتاجة اسعار مبادرة خفض السلع وبيشتروا على قدهم وحسب ظروفهم وجشع البعض هيحرمهم من حقهم في سلعة رخيصة ولأن نجاح المبادرة يعني تكرارها ومد العمل بيها وبكده يبقى كله مستفاد، وفيه تصرفات تانية مش مقبولة وبردو بيكون وراها تاجر جشع بيشتري سلع بأسعار مخفضة وبكميات كبيرة ويخزنها عشان يرجع يبيعها بالغالي وطبعا دا تصرف مفهوش مرؤة لأنه بيجي على حساب الفقير والمحتاج.
