شغل المكن.. الصناعة استثمارات بالمليارات وتحدي ضد عقارب الساعة
مجمعات صناعية في كل ربوع الوطن،زيادة في التصدير ورغبة في الاكتفاء الذاتي،ماذا فعلت الدولة في ملف الصناعة.. يلا بينا نعرف
هي الصناعة فين؟؟ أهم حاجة الصناعة.. علشان نزود الصادرات ونقلل من الواردات
دي جملة دايما بتكون على لسان الناس لما بتيجي سيرة الصناعة في البلد
طبعا الصناعة هي الأساس في تقدم وبناء الدول.. وعليها بيتم التقدم والتنمية في كل ربوع الوطن
والدول اللي اهتمت بالصناعة هي اللي تقدمت وحققت إنجازات كبيرة
طيب هل الدولة خلال ال ٩ سنين اللي فاتت ماهتمتش بالصناعة
الإجابة قطعا هي لا
ودا لأن خلال ٩ سنوات تم تأسيس ١٧ مجمع صناعي في ١٥ محافظة في مصر.. ودا لتوفير 5046 وحدة صناعية مجهزة بتكلفة استثمارية إجمالية بلغت حوالى 10 مليارات جنيه.
كم المصانع دي ساهمت وفقا لبيانات وأرقام الجهاز المركزي للتعبئة والاحصاء في خفض البطالة ودا بعد توفيرها 48 ألف فرصة عمل مباشرة للشباب، وكمان تمت إتاحة وتوفير منتجات جديدة للسوق الداخلى وتقليل الاعتماد على المنتجات المستوردة.
خلال ال ٩ سنوات اللي فاتو.. قطاع الصناعة والتجارة شهد تطور ملموس، وبلغت نسبة مساهمة الصناعة فى الناتج المحلى الاجمالي ل 16.8 %.
وكمان يلغت التكلفة الاستثمارية للقطاع شاملة المشروعات الصغيرة والمتوسطة 128.2 مليار جنيه خلال السنوات التسع الماضية، وبلغ حجم الصادرات المصرية 51.6 مليار دولار مقابل 27.6 مليار دولار فى 2014 بزيادة 87 %.
وأهم مستهدفات القطاع الصناعى بخطة عام 2024/23. هو توجيه استثمارات قدرها نحو 100.7 مليار جنيه لقطاع الصناعات التحويلية، بالإضافة إلى تعميق التصنيع المحلى.
السؤال المهم واللي أكيد هاتطرحه.. اية هي أبرز المجمعات الصناعية اللي تمت بالفعل
وهنا هنشاور على أبرز المجمعات دي.. ومنها تدشين أكبر مدينة لصناعة الأثاث في دمياط بمساحة تتخطي 330 فدان واللي بتضم أحد أهم القطاعات الاقتصادية في مصر، واللي كان هدفها تلبية احتياجات السوق المحلية وتوجيه الانتاج للتصدير.
كمان تم تدشين مدينة للنسيج في السادات بالمنوفية والتي تقام على مساحة 3.1 مليون متر باستثمارات مصرية وشراكة صينية.
نروح على المشروع المهم.. وهو مدينة مدينة الروبيكى. واللي تم الانتهاء من تشغيلها لصناعة الجلود على مساحة 160 فدان، وضيف على كدا إنشاء مدينتين للنسيج فى بدر، دا غير المجمعات الصناعية الصغيرة فى مدن السادات وجنوب الرسوة وغيرها.
والهدف من المجمعات دي هو الحد من الاستيراد العشوائى، وفتح الطريق أمام الصناعة الوطنية، علشان يصل إجمالي المصانع الصغيرة التي يجرى تدشينها أكثر من 4 آلاف مصنع.
وخلال ال ٩ سنين اللي فاتت شهدت مصر افتتاح أكبر مصنع للأسمنت بالشرق الأوسط بمدينة بنى سويف، واللي أقيم وفقًا لأحدث المعايير البيئية الحديثة فى العالم، ودا بيضم 6 خطوط إنتاج تخدم 6 آلاف مستفيد من الأسمنت يوميا؛ وبيعمل كمان على جذب الاستثمارات إلى صعيد مصر.
ولأول مرة فى مصر، الدولة أسست "مصنع للنجيل الصناعي" واللي كان بهدف توفير احتياجات السوق المصرية من النجيل الصناعى والسماح بتصدير الفائض للخارج، بهدف توفير المياه المستهلكة وخفض تكلفة صيانة النجيل الطبيعى.
دا غير مصنع الإطارات في بورسعيد ومصنع لتصنيع شرائح الكوارتز والرمال السوداء وغيرهم كتير.
هنا بقى لازم حضرتك تعرف حاجة مهمة.. وهي إن العوائد اللي بتيجي من الصناعة بتاخد وقت.. وطبعا في مصانع بدأت في الإنتاج وأخرى قيد التنفيذ.
والدولة نهجها واضح في المسألة دي وهي زيادة الرقعة الصناعية لزيادة التصدير واللي حلمنا فيه نوصل ل ١٠٠ مليار دولار تصدير.
