الصين هتحل لمصر أزمة الدولار.. التنين الآسيوي يتدخل في الوقت المناسب

في نهاية شهر اغسطس اللى فات وبعد الاعلان عن قبول ملف مصر فى تجمع بريكس تم الكشف عن عدد من الخطط اللى التحالف شغال عليها واللي الهدف منها تقليل الاعتماد بشكل كبير على الدولار الامريكي فى المعاملات التجارية وكمان فى حجم الاحتياطي النقدي فى البنوك المركزية حوالين العالم.. وده هيتم من خلال اتفاقيات مبادلة العملات المحلية اللى هيتم توقيعها بين الدولا العضاء فى بريكس واللى هتخلى كل دولة تشترى احتياجاتها والسلع اللى عاوزها من باقي الدول وتسوى المعاملات دي بالعملة المحلية مش بالدولار.. وفي الساعات الأخيرة حصل تطور مهم جدا هيكون ليه تاثير ايجابى على حل أزمة نقص العملة الأمريكية فى مصر.. فيا ترى ايه اللى حصل ؟ وازاى هيكون ليه دور مهم فى انقاذ مصر من واحدة من اصعب الأزمات الاقتصادية اللى بتعيشها؟

من كام يوم بدأ حسن عبدالله محافظ البنك المركزي المصري زيارة رسمية لدولة الصين الشعبية قابل خلالها نظيره الصيني  بان شنج،محافظ البنك الشعبي الصيني وخلال مراسم استقباله ألقى حسن عبدالله  كلمة أمام الحاضرين وهم من كبار ممثلي المؤسسات الدولية، ومنها صندوق النقد الدولي والبنك الدولي وبعض البنوك المركزية التانية ،وأكد عبدالله عمق واستراتيجية العلاقات الثنائية بين مصر والصين.

ووجه محافظ البنك المركزي الشكر للجانب الصيني على دعوته لحضور الاحتفال باليوم الوطني الصيني واحتفالات منتصف الخريف، وأكد تطابق وجهات النظر بين القاهرة وبكين بشأن الحاجة إلى تعزيز التعاون المشترك، وقال أن الزيارات المتبادلة بين الجانبين على أعلى مستوى هتساهم في تعميق التعاون بين الجانبين في كل المجالات خصوصا في الشئون الاقتصادية والمصرفية.

ودعا حسن عبد الله البنوك الصينية لدخول السوق المصري وأكد على أهمية أن البنوك الصينية تكون أكثر تواجدا في مصر نظرا لكبر حجم التبادل التجاري بين الدولتين وده طبعا هيساهم في تعزيز التكامل المالي بينهم وأعرب عن امنياته بالتعاون مع الصين لفتح المزيد من القنوات بين الصين وأفريقيا عن طريق مصر.

محافظ البنك المركزي القى الضوء على الدور الكبير اللى بتلعبوا مصر  فى بنوك التنمية متعددة الأطراف؛ خصوصا انها استضافت مؤخرا الاجتماع السنوى لبنك التنمية الإفريقى والبنك الآسيوى للاستثمار فى البنية التحتية

كل ده كلام حلو وجميل .. لكن على هامش الزيارة حسن عبدالله ناقش موضوع مهم جدا وخطير وهيكون ليه دور كبير فى أزمات مصر الفترة الجاية.. فيا ترى ايه الموضوع ؟

بص يا سيدي مصر شغالة على مشروع كبير جدا هو مؤشر الجنيه وده مؤشر هيتم اطلاقه قريب جدا وهيربط الجنيه بسلة من العملات بعيدا عن الدولار وبناء على السلة دي هتتحدد قيمة الجنيه وسعره فى السوق يعنى العملة المصرية مش هتكون مربوطة بالعملة الامريكية بس ولكن بعملات تانية زي الاسترليني واليورو والروبل واليوان وكمان بعض المعادن الثمينة ومنها الدهب والفضة.

وكمان مصر شغالة على مشروع كبير تانى لمبادلة العملات المحلية مع عدد من الدول الكبرى ومنها الهند وروسيا والصين ودول تانية كتيرة هيتم الاعلان عنها الفترة الجاية وفى اجتماعه فى الصين ناقش حسن عبدالله اخر التطورات فيما يتعلق باتفاقية مبادلة العملات بين مصر والصين فى إطار تعزيز التعاون الاقتصادى والمالى بين البلدين وفى ضوء توجيهات القيادة السياسية بدفع التعاون فى اتفاقية مبادلة العملات والإسهام فى الاستقرار المالى، وعزم الحكومة المصرية إصدار سندات الباندا المقومة باليوان الصينى.

وأهمية اتفاقية مبادلة العملات مع الصين مهمة جدا لأن الصين تعدّ من أهم الشركاء التجاريين لمصر على مستوى العالم، وحجم التبادل التجاري بين البلدين بلغ العام الماضي حوالى 16 مليار دولار وده رقم كبير جدا ممكن مصر توفرلوا لو تعاملت مع الصين بالعملات المحلية وده هيخفف الضغط على الاحتياطي النقدي من الدولار وكمان هيقلل فاتورة الاستيراد

وبتحرص الحكومة المصرية خلال المرحلة الحالية على إيجاد توازن بالميزان التجاري  مع الصين من خلال زيادة الصادرات المصرية للصين، والترويج للمنتج المصري بين أوساط الشعب الصيني.