تفخيخ الأسواق وحرق السلع.. أخطر مخطط لتسخين الشارع
مين من مصلحته يسخن الناس على الدولة وازاي السلع بتختفي في أيام وسعرها يضرب في السما رغم مفيش أزمة في الإنتاج والتوزيع وايه اللي حصل في السكر والأرز والطماطم والبصل وقبلهم السجاير وليه هي مش أزمات طبيعية وكلها مفتعلة ومين بيدير مافيا الأسواق وعاوز يوصل لايه.. خليكم معانا هتعرفوا تفاصيل أخطر مخطط لتخريب البلد.
عادة سعر اي سلعة بيزيد لما بتنقص في السوق والطلب عليها اكتر من المعروض ودا الطبيعي في أي سوق وغالبا نقص المعروض دا بيكون ليه أسباب كتيرة زي مثلا التغيرات المناخية زي المطر الشديد أو الجفاف لما تدمر محصول من المحاصيل فطبيعي دي أزمة طبيعة وبتحصل في كل دول العالم وهنا طبيعي سعر السلعة وليكن بطاطس طماطم فراولة إنه يرفع كتير كل ما الطلب زاد عليها لأن المعروض منها قليل لكن المش طبيعي إن الإنتاج يبقي وفير وبيطلع من المزارع بنفس الكمية اللي بيطلع منها كل سنة وفجأة السلعة تقل جدا في السوق وسعرها يضرب وهنا اللغز والحلقة المفقودة في سلسلة التوزيع وهنا مكمن المؤامرة بردو.
اللي بيحصل حضرتك في السوق دلوقتي مع الطماطم هو اللي بيحصل في السكر والأرز وحصل قبل كده في السجاير وقبلها في الألبان الإنتاج وفير لكن السلع بتختفي لما توصل الموزعين والسعر يرتفع بشدة. طيب السلع بتروح فين.. دا سؤال مهم جدا وهو محور الحلقة واللي جاوب على السؤال دا فيديو انتشر من ساعات وهو فيديو صحيح ومش متفبرك وصوره قائد سيارة كان ماشي على طريق صحراوي لما المشهد صدمه بعد ما شاف تريلا نقل تقيلة بمقطورة طويلة عليها أطنان من الطماطم الطازجة والسليمة ناس بتتخلص منها بسرعة وخوف وترميمها في الرمل وكان باين عليهم بيعملوا عملة لكن الفيديو فضح الواقعة اللي شاءت الظروف تفضح مخطط كبير جدا على البلد وبان إن الموضوع مش موضوع احتكار للسلع عشان تزيد وبس والا مكانوش رموا الطماطم في التراب لكن المقصود من التصرف دا تفريغ الأسواق من السلع وصناعة أزمة حقيقية في الأسعار لدرجة إن الناس متقدرش تشتري ولما متقدرش تسخن وتغضب وغضبها يسمع وتخلق واقع جديد قبل الانتخابات الرئاسية تقدر ساعتها قنوات الإخوان والأجهزة المعادية تشتغل عليه ويقولوا شوفو مصر وصلت لحد فين.
لو حضرتك مش متخيل السيناريو دا هيبقى عندك مشكلة حقيقية في فهم حجم الخطر على البلد وهتقولي الحكومة فين هقول لحضرتك إن الحكومة مفهاش ألف ايد عشان تجري ورا تجار العملة والمحتكرين والمضاربين في الأسواق والتجار عديمي الضمير والأجهزة الاجنبية اللي داخله تخرب ومش معني كده إننا بندافع عن الحكومة ولا بنقول انها مش بتعمل حاجة بالعكس دي بتخوض حرب حقيقية من شهور ضد مخطط التخريب وقدرت توجه ضربات كتيرة معلنة وسرية عشان تحبط مخطط حرق البلد بس انت كمواطن محتاج تفهم الصورة كويس.
