مصر هتصنع اتوبيسات كهربا وهتصدرها لأوروبا.. أيام المجد راجعة تاني

  
الرئيس السيسي مهتم جدا بملف توطين الصناعة.. وبيتابع بنفسه اللى بيحصل فى الملف ده والاجراءات اللى بتاخدها الحكومة لتشجيع المستثمرين وتقديم حوافز اضافية للشركات الأجنبية عشان تيجي تشتغل فى مصر.. وبدل ما كنا بنستورد بضايع بمليارات الدولارات هنوفرها وهنشغل أيدي عاملة وكمان هنصدر الانتاج للخارج ونجيب عملة صعبة..والنهاردة تم الاعلان عن واحد من المشروعات الضخمة اللى هترجع مجد مصر وهتخلينا نصدر منتجات مهمة لدول اوروبا.. فيا ترى ايه اللى حصل ؟ وازاى مصر هتستفيد من المشروع ده؟

من ساعات وقع  المهندس أحمد سمير وزير التجارة والصناعة، مع يوهان فورسيل وزير التعاون الدولي والتجارة الخارجية السويدي اتفاقية تصنيع مشترك بين شركة صناعة وسائل النقل MCV، وشركة فولفو VOLVO، بهدف تصنيع أتوبيسات كهربائية لتصديرها للسوق الأوروبي، وبنسبة مكون محلي تبلغ 50%.
والاتفاقية بتأتي في إطار التعاون المشترك بين الشركتين اللي بدأ من أكتر من 20 سنة لتصنيع أتوبيسات للسوق الإنجليزي، وبيمتد بتوقيع الاتفاقية الجديدة لتصنيع أتوبيسات كهربائية خالية من الانبعاثات للأسواق الأوروبية
وبتستهدف الاتفاقية تعزيز التعاون المشترك بين الشركتين المصرية والسويدية، بشكل يساهم في توطين صناعات وسائل النقل في مصر ومنها صناعة الأتوبيسات الكهربائية الصديقة للبيئة وزيادة حجم الاستثمارات في مصر خلال المرحلة الجاية.
والاتفاق ده من أهم ثمار الزيارة اللى قام بها وفد وزارة التجارة للعاصمة السويدية ستوكهولم خلال شهر مارس اللى فات واللي تم خلالها عقد لقاءات مع عدد من الشركات السويدية من بينها شركة فولفو، بجانب لقاء مع يوهان فورسيل، وعدد كبير من المسؤولين بالحكومة السويدية إلى جانب المشاركة بفعاليات منتدى الأعمال المصري السويدي المشترك.
وخلال الزيارة دي تم دعوة الشركات السويدية لضخ استثمارات بالسوق المصري للاستفادة بالمزايا الكبيرة اللي يتيحها الاستثمارفي مصر.

والحكومة المصرية حريصة على زيادة التعاون الاقتصادي مع السويد خلال الفترة الجاية وبتتطلع لمزيد من التعاون على الصعيد الاستثماري والصناعي المشترك ووزارة شغالة كويس جدا على توفير كافة أوجه الدعم لشركات السيارات العالمية للإنتاج والتوسع في السوق المصري بما يسهم فى ضخ استثمارات حقيقية وتوطين الصناعة وتوفير المزيد من فرص العمل المباشرة وغير المباشرة أمام الشباب.
وبتولي مصر  أهمية قصوى لصناعة السيارات الكهربائية ووسائل النقل الجماعي لتلبية متطلبات واحتياجات المستهلك المصري خلال المرحلة الحالية والمستقبلية، للتوافق مع التوجهات العالمية نحو إيجاد مركبات صديقة للبيئة. 
وكمان فيه حرص من الدولة على نقل التكنولوجيات والخبرات العالمية للصناعة المحلية والتوجه نحو استخدام الطاقة النظيفة بوسائل النقل الجماعي من مبادرة إحلال المركبات للعمل بالغاز الطبيعي والطاقة الكهربائية، والحكومة شغالة على تهيئة البيئة المناسبة للتحول نحو الطاقة النظيفة من خلال توفير البنية التحتية اللازمة لشحن السيارات الكهربائية.
وبتمتلك مصر العديد من الإمكانات والمقومات الكبيرة اللى ممكن تساهم في توطين صناعة السيارات والأتوبيسات الكهربائية سواء للسوق المحلي أو التصدير للأسواق الإقليمية وأسواق دول القارة الأفريقية وكمان اوروبا.

ومن أهم الخطوات اللي خدتها الدولة إنشاء المجلس الأعلى لصناعة السيارات، وإصدار استراتيجية تطوير صناعة السيارات اللى بتشمل حوافز لتوطين صناعة السيارات والصناعات المغذية ليها في إطار البرنامج المصري لتنمية صناعة السيارات.