خبير عالمي يضع حلول لأزمة الاستثمار والديون في مصر

 سباق عنيف بين الدول في العالم كله على جذب الاستثمارات في كل المجالات، وعشان كده كله بيعمل المستحيل عشان يخلق فرص ومزايا لاغراء المستثمرين يجو يعملوا مشروعات وطبعا فيه تريليونات الدولار بتلف العالم في مشروعات عملاقة وطبعا المستثمر هدفه الأساسي تحقيق أكبر قدر من المكسب عشان كده بيختار الدولة اللي عندها اكبر مزايا من الأمان والاستقرار ومناخ المكسب.. مصر من ضمن الدول اللي عندها فرص استثمارية كبيرة ومتنوعة بتنوع نشاطها الاقتصادي بحكم موقعها الجغرافي وإمكانياتها البشرية وثرواتها الكبيرة لكن محتاجة تكبر الملف ده باحترافية اكتر.. تعالوا نشوف روشتة الدكتور محمود محي الدين خبير الاستثمار والاقتصاد العالمي عشان الاستثمار في مصر ينطلق وتنتهي مشكلة الديون الخارجية.

في الأول لازم نعرف أن الاستثمار من أهم أدوات الدول للتقدم بأقل تكلفة لأن الدول مش بتدفع حاجة بالعكس دي كسبانة من كل النواحي والراجل المستثمر بيجي يحط فلوس والدولة بتاخد جزء من المكسب في صورة رسوم وضرايب دا غير تشغيل الشباب وتقوية الاقتصاد الدكتور محمود محي الدين مبعوث الأمم المتحدة للتنمية المستدامة قال إن مصر بتملك قدرة عالية جداً على جذب الاستثمار المباشر ، مع اتخاذ عدد من الإجراءات المحفزة و"توصيلها إلى المجتمع المحلي.

وقال  محي الدين إنه متفائل بالتدابير الأخيرة اللي تم اتخاذها منذ عقد المؤتمر الاقتصادي في مصر، وإعادة إحياء المجلس الأعلى للاستثمار وشايف إن دي خطوة في الاتجاه الصحيح لانطلاق الاستثمار في مصر وجذب اكبر أموال ممكنة لكن رجع وأكد إن أهم خطوة قدام مصر دلوقتي هي استعادة ثقة المستثمرين ودا عايز جهد كبير لكن ده ممكن في ظل وجود فرص اقتصادية متنوعة، فضلاً عن المجال الإقليمي المناسب للتوسع سواء بالنسبة للاستثمار أو التصدير.

واتكلم الخبير العالمي عن  أزمات مصر  الاقتصادية وقال إنها أزمات عابرة وإنه في آخر 10 سنين كانت فيه تحديات أمنية كبيرة، وبالتالي فإن تراجع الاستثمار بشكل عام كان أمر طبيعي، لكن في نفس الوقت لازم الحكومة المصرية تستكشف الفرص للمشاركة مع القطاع الخاص باعتباره أمر ضروري لمعالجة مشكلة الديون.

لحد هنا خاص كلام الدكتور محي الدين لكن كلامه مهم جدا لانه بيكشف الطريق لاستعادة مصر مكانتها في سوق الاستثمارات الدولية وإن مصر بإمكانيات الموقع والثروات واللوجستيات والقوة البشرية قادرة تبقي قوة دولية في مجال الاستثمار المباشر وطويل الأجل.