تصريح خطير من رئيس الوزراء عن سعر الجنيه.. هل انتهى زمن التعويم؟

من بداية 2023 وكل شوية بنسمع عن تعويم الجنيه، ومفيش أسبوع بيعدي تقريبا من غير ما يصدر تقرير من مؤسسة تمويل دولية بيتوقع انخفاض جديد في قيمة الجنيه المصري قدام الدولار.. ورغم استقرار سعر صرف الجنيه في البنوك المصرية لأكتر من شهرين متواصلين لسه بنسمع أصوات شايفة ان الجنيه مقيم بأعلى من سعره العادل.. لكن النهاردة الدكتور مصطفى مدبولى رئيس الحكومة قطع الشك باليقين زي ما بيقولوا وقال تصريح مهم وخطير عن مستقبل الجنيه المصري.. فيا ترى قال ايه ؟ وايه معنى كلامه ؟ وهل كده مش هنشوف تعويم تانى للعملة المصرية؟
 
الدكتور مصطفى مدبولي، رئيس مجلس الوزراء، كان النهاردة بيرأس اجتماع الحكومة الاسبوعى في العاصمة الادراية الجديدة وبعد نهاية الاجتماع أدلى بتصريحات مهمة وكاشفة عن مستقبل سوق الصرف في مصر.
رئيس الحكومة أعلنها النهاردة صريحة ويمكن ده بيحصل لأول مرة وقال ان الجنيه المصري مُقدّر بأقل من قيمته نتيجة نقص العملة الصعبة في الأسواق وقال ان ده بيؤدي الى مبالغة في تقدير سعر العملة الأجنبية مقابل الجنيه
مدبولي أكد انه باتفاق جميع الخبراء الجنيه المصري حاليًا مُقدر بأقل من قيمته الحقيقية، وقال ان كل شغل الشاغل  الفترة دي على  تقييم الجنيه بقيمته الحقيقية.
وشدد رئيس الحكومة على ان ضخ الاستثمارات يؤدي لدخول عملة صعبة للبلد، و«بالتالي لن تحدث أزمة في الدولار، ويبدأ تقييم الجنيه بقيمته الحقيقية». 
تصريحات الدكتور مدبولى النهاردة بتؤكد المعلومات اللى انفردت بانكير بنشرها طول الأيام اللى فاتت عن ان مفيش تعويم تانى الفترة دي وان القطاع المصرفي ناجح لحد دلوقتي في توفير الموارد الدولارية المطلوبة للمستوردين وان البلد هيدخلها موارد بالدولار الفترة الجاية هتساهم في تقوية موقف الجنيه سواء من خلال برنامج الطروحات لعدد من الشركات المملوكة للدولة في البورصة او من خلال تمويلات من مؤسسات دولية.