الأربعاء 08 فبراير 2023
رئيس التحرير
عمرو عامر
المشرف العام
عبدالعظيم حشيش
شمول مالي

هل شكل الدمغة بيختلف بين الدهب المصري والمستورد

الجمعة 20/يناير/2023 - 12:18 ص
الذهب
الذهب


لو هتشتري دهب اتأكد من الدمغة...... وريني اشتريت إيه دهب ....انت بتدور على إيه؟.. بدور على الدمغة ليكون الدهب براني..  ليه أهم حاجة لما نروح نشتري الدهب بندور على الدمغة وإيه هي قصتها والدهب لو مش مدموغ يبقي ايه مصيره.
في الأول لازم نعرف الدمغة ببساطة هي علامة رسمية بيتم بيها ختم الدهب والمعادن الثمينة زي الفضة ودي لضمان عيار الدهب المتداول.. والدمغة بتختلف بين كل دولة والتانية ولها مواصفات معينة بيلتزم بيها التجار والصناع.. يعني الدمغة في الدهب عاملة زي ختم شعار النسر على الورق الرسمي لازم يكون واضح وإلا الورق مش هيتقبل والدمغة مش مجرد ختم وخلاص ده ليلة كبيرة وليها شكل وتاريخ ومواصفات.

ولو هنرجع لكتاب التاريخ هنلاقي إن عملية دمغ الدهب ظهرت أول ماظهرت في عهد الدولة العثمانية بسبب انتشار صناعة الحلي والمجوهرات.. وفي مصر عرفت دمغ الدهب والفضة في عهد الخديوي عباس الأول، وبعدها صدر قانون تنظيم عمليات الدمغ خلال الاحتلال الإنجليزي وكان بيتم الدمغ بأقلام لسه بستعملوها لغاية دلوقتي.
طيب ليه الدهب بيدمغ.. شوف حضرتك الهدف من دمغ الدهب زمان هو نفس الهدف منه دلوقتي منع التلاعب في أسعاره وتهريبه وفي نفس الوقت عشان السوق والمعادن تكون تحت عيون الدولة وكمان عشان منع الغش والتزوير ويسهل تعقب أي معادن بتستخدم في أعمال غسيل أموال أو تمويل عمليات مشبوهة وعلامة الدمغة دليل على سلامة الدهب اللي معاكي وهي بتشبه رخصة السلاح مهمة جدا عشان تعرف تمشي بيه وغير كده الدهب اللي مش مدموغ بيكون شبهة على صاحبه وإنه جاي من مصدر غير مشروع وكمان سعره بيقل جدا كأنك بتبيع عربية متهربة من الجمارك.
طيب إيه هي أنواع الدمغة وشكلها .. تعالي هنقول لحضرتك .. شكل الدمغة بيتكون من 4 علامات كل واحدة بتعبر عن معلومة معينة ولازم الأربعة يكونوا مجتمعين.

أول العلامات هي علامة المعيار وهو عبارة عن رقم بيعبر عن نوع عيار الدهب وهو نوعين دمغة الحكومة المصرية بالنسبة للدهب المصري وهي (875 لعيار21، 750 لعيار18)، أما الدمغات الأجنبية فبيتم دمغها بـ 4 معايير (750 لعيار 18، 585 لعيار 14، 500 لعيار 12، 375 لعيار 9 ) والأرقام دي بتعبر عن نسبة الدهب الموجودة في القطعة وكل عيار ليه نسبة معينة، وبتثبت أن القطعة اتفحصت ومطابقة للمعايير الموجودة في قوانين الدمغة.



علامة المكتب وهي علامة المكان اللي قام بمراجعة ختم الدمغة والتأكد أنها صحيحة ومطابقة للدهب وكل مركز أو مصنع ليه ختم معين خاص بيه.

تالت علامة في الدمغة هي ختم تاريخ اليوم اللي تم فيه دمغ الدهب، وده بالنسبة لشكل الدمغة الخاص بالمشغولات المحلية المصرية.

طيب في حالة الدهب كان مستورد من بره وداخل بطريقة مشروعة إيه الفرق في الدمغات بقي .. بسيطة كل الدول بتدمغ أو تختم الدهب بتاعها على طريقتها واختام الدول دي بتكون معترف بيها بين الدول، يعني إيه.. يعني حضرتك المعلومات المحفورة على الدهب هي نفسها ولكن بتختلف إن الدهب المستورد وبيكون باللغة الإنجليزية والدهب السويسري بيتحفر عليه حرف (S) ونوع العيار والإيطالي بيتكتب عليه حرف (I) وبعده عيار الدهب والمعتاد إنه عيار 18 وأصلي.. عشان كده اوعي تشتري دهب من غير ماتشوف الدمغة وشكلها وتاريخها.