3.1 مليار دولار في 6 شهور.. 5 قطاعات تسحب استثمارات ضخمة إلى مصر
3.1 مليار دولار دخلوا 5 قطاعات في الاقتصاد المصري خلال 6 شهور بس.. قطاعات مش بس بتجذب الاستثمارات، دي كمان بتساهم بنحو 50% من النمو الاقتصادي في مصر.
طيب، مين القطاعات الخمسة اللي بتجذب الفلوس دي؟ وليه الدولة بتراهن عليها في الفترة الجاية؟ أول قطاع هو الزراعة، اللي بتمثل أهمية كبيرة في توفير الغذاء ودعم الإنتاج المحلي.
تاني قطاع هو الصناعات التحويلية، وده اللي بيحوّل المواد الخام لمنتجات جاهزة، وبيفتح الباب لزيادة الإنتاج وتقليل الاعتماد على الاستيراد.
تالت قطاع هو الاتصالات وتكنولوجيا المعلومات، مع التوسع في الخدمات الرقمية والتكنولوجيا.
رابع قطاع هو السياحة، اللي بتدعم النشاط الاقتصادي وبتوفر فرص عمل، وكمان بتساهم في جذب العملة الأجنبية.
أما القطاع الخامس فهو الطاقة، باعتباره عنصر أساسي لتشغيل المصانع ودعم المشروعات والاستثمارات الجديدة.
ووفقًا لتصريحات وزير التخطيط والتنمية الاقتصادية، القطاعات الخمسة استقطبت استثمارات بحوالي 3.1 مليار دولار خلال النصف الأول من العام المالي 2025/2026، واستحوذت على نحو 40% من الناتج المحلي الإجمالي، وضمت حوالي 40% من إجمالي المشتغلين في مصر.
والحكومة مستهدفة كمان رفع معدل النمو الاقتصادي من 5.1% حاليًا إلى 6.8% بحلول العام المالي 2029/2030، مع التركيز على زيادة الإنتاجية وتوفير فرص عمل وتحسين دخول المواطنين.
لكن السؤال الأهم: هل الاستثمارات دي هتتحول لفرص عمل أكتر وإنتاج أكبر، ولا الأرقام الكبيرة لسه محتاجة تنعكس بشكل مباشر على حياة المواطن؟
