قفزة 66% في المازوت.. مصر تتحرك لتأمين وقود محطات الكهرباء خلال أكتوبر

قفزة بأكتر من 66% في كميات المازوت لمحطات الكهرباء في مصر.. إيه اللي بيحصل في ملف الطاقة؟

مصر رفعت كميات المازوت اللي بتوردها لمحطات الكهرباء من 15 ألف طن يوميًا إلى 25 ألف طن خلال أكتوبر، بزيادة حوالي 66.6%، في تحرك يستهدف تأمين احتياجات المحطات من الوقود.

والسبب مش بس تأمين التشغيل.. لكن كمان ارتفاع تكلفة الغاز الطبيعي المسال المستورد، اللي وصل سعر المليون وحدة حرارية منه لحوالي 24 دولار خلال أكتوبر، مقارنة بـ14 دولار في سبتمبر.

في المقابل، سعر الكمية المكافئة من المازوت بيدور حوالين 14 دولار، وده بيخلي زيادة الاعتماد عليه خيارًا لتقليل تكلفة الوقود المستخدم في توليد الكهرباء.

وعشان كده، مصر بتستهدف كمان زيادة وارداتها من المازوت بنحو 300 ألف طن إضافية خلال أكتوبر، مع خفض إمدادات الغاز الطبيعي لمحطات الكهرباء إلى حوالي 3.3 مليار قدم مكعبة يوميًا.

لكن التحدي الأكبر إن استهلاك مصر من الغاز الطبيعي لسه أعلى من الإنتاج المحلي، وده بيخلي تأمين الوقود لمحطات الكهرباء ملف مهم لضمان استقرار الشبكة وتقليل ضغوط التكلفة.

فهل زيادة الاعتماد على المازوت هتساعد مصر تقلل فاتورة تشغيل محطات الكهرباء؟