73 محورًا على النيل.. مصر تفتح طرقًا جديدة للتنمية والاستثمار
من 38 لـ73 محور وكوبري على النيل.. مصر بتوسع شبكة الطرق وبتقلل المسافات بين شرق النهر وغربه، في خطة هدفها تسهيل حركة المواطنين والبضائع وفتح طرق جديدة للاستثمار.
قبل عام 2014، كان عدد الكباري والمحاور على النيل 38، لكن الخطة الجديدة استهدفت إنشاء 35 محورًا إضافيًا، علشان يوصل الإجمالي إلى 73 محورًا وكوبريًا من شمال مصر لجنوبها.
والأرقام بتكشف إن الخطة مش مجرد إنشاء كباري للعبور.. لكن كمان ربط المناطق الصناعية والزراعية والتجمعات العمرانية بشبكة الطرق الرئيسية، علشان نقل البضائع والمنتجات يبقى أسرع وتكلفته أقل.
ووفقًا لبيانات وزارة النقل، تم الانتهاء من تنفيذ 19 محورًا جديدًا، منها 14 محورًا في الصعيد و5 محاور في الدلتا، وجارٍ تنفيذ 7 محاور أخرى، بينما توجد 9 محاور ضمن الخطط المستقبلية.
ومن أهم أهداف التوسعات دي تقليل المسافات بين المحاور إلى نحو 25 كيلومترًا، بدلًا من مسافات كانت بتوصل في بعض المناطق إلى 100 كيلومتر، وده بيساعد على تسهيل انتقال السكان بين ضفتي النيل، وتقليل الاعتماد على المعديات في المناطق اللي مفيهاش كباري قريبة.
والأهم اقتصاديًا إن المحاور الجديدة بتربط مناطق الإنتاج بالأسواق ومراكز التوزيع، وبتسهل وصول مستلزمات الإنتاج للمصانع، ونقل المحاصيل من الأراضي الزراعية، وكمان بتدعم حركة السياحة والتوسع العمراني في المحافظات.
يعني خطة الـ73 محورًا مش بس لتقليل وقت الطريق، لكنها كمان بتستهدف ربط مناطق التنمية ببعضها، وتسهيل حركة التجارة، وفتح فرص أوسع للاستثمار في الصعيد والدلتا.
