953 ألف شكوى في 3 شهور.. إيه اللي بيحصل بين العملاء والبنوك؟
تقرير الاستقرار المالي الصادر عن البنك المركزي المصري كشف عن ارتفاع عدد الشكاوى اللي وصلت للبنوك خلال أول 3 شهور من 2026 وقال انها قربت من المليون شكوى وتحديدا حوالي 953 ألف شكوى.. مقارنة بنحو 746 ألف شكوى خلال نفس الفترة من السنة اللي فاتت.. يعني زيادة وصلت لـ28%.
لكن المفاجأة إن التقرير ربط الزيادة دي بأكتر من عامل.. أولها التوسع في استخدام تطبيقات الموبايل والخدمات المصرفية الإلكترونية.. اللي خلت تقديم الشكوى ومتابعتها أسهل من زمان.
كمان وعي العملاء بحقوقهم زاد.. وبقوا أكتر معرفة بحقهم في تقديم الشكاوى ومتابعة الرد عليها.. بالتزامن مع حملات التوعية وتطوير البنوك لقنوات استقبال الشكاوى.
وفي نفس الوقت قاعدة العملاء في القطاع المصرفي بتواصل النمو.. والتقرير أشار لارتفاع عددهم من 52 مليون إلى 54.7 مليون عميل.. وده بيعكس اتساع نطاق التعامل مع الخدمات المصرفية.
وهنا لازم نفرق بين زيادة عدد الشكاوى وبين زيادة المشكلات نفسها.. لأن ارتفاع الشكاوى لوحده مش دليل كافي على تراجع جودة الخدمات.. لكنه مؤشر مهم محتاج تحليل لمعرفة أسباب كل شكوى ومدى سرعة حلها.
وعشان كده البنك المركزي أكد أهمية متابعة مؤشرات الشكاوى واتخاذ الإجراءات التصحيحية اللازمة لتحسين جودة الخدمات وتعزيز ثقة العملاء في البنوك.
