18.4 مليار دولار من السياحة.. مصر حصدت كام من كنز الأجانب في 2025-2026؟
18.4 مليار دولار دخلوا مصر من السياحة في سنة مالية واحدة.. والرقم ده أكبر من مجرد فلوس بيدفعها السياح في الفنادق والرحلات
بحسب بيانات البنك المركزي المصري، إيرادات السياحة وصلت لـ18.4 مليار دولار خلال العام المالي 2025-2026، مقابل 16.7 مليار دولار في السنة السابقة.. يعني زيادة حوالي مليار و700 مليون دولار، بنسبة نمو 10.3%.
طيب الفلوس دي بتفرق في إيه؟
السياحة واحدة من أهم مصادر العملة الأجنبية لمصر، لأنها بتوفر دولارات بتساعد في تمويل احتياجات الاقتصاد، وبتحرك قطاعات كتير، من الفنادق والمطاعم والنقل، لحد الأسواق والبازارات والخدمات السياحية.
والرهان مش بس على زيادة عدد السائحين، لكن كمان على إنفاقهم خلال الرحلة، ومدة إقامتهم، وقدرة المقاصد المصرية على جذب زوار من أسواق مختلفة.
واللافت إن وزير السياحة والآثار استهدف وصول الإيرادات لنحو 20 مليار دولار بنهاية عام 2026، مع استهداف استقبال 20 مليون سائح خلال العام.
يعني إحنا بنتكلم عن قطاع بيحقق مليارات الدولارات، والسؤال الأهم: هل مصر تقدر تزود حصيلة السياحة وتحوّل النمو ده لمصدر أكبر ومستدام للعملة الأجنبية؟
الأرقام بتقول إن الإيرادات بتزيد.. والتحدي دلوقتي هو استمرار الزيادة.
