الشورت سيلينج قرب يدخل البورصة المصرية.. بس إيه حكايته؟

البورصة المصرية بتستعد لدخول آلية جديدة للتداول، اسمها «الشورت سيلينج»، والرقابة المالية بدأت تجارب فنية بالتعاون مع مصر للمقاصة والبورصة، علشان تتأكد إن الأنظمة جاهزة قبل الإطلاق الرسمي.

طب يعني إيه شورت سيلينج؟.. المستثمر بيقترض أسهم، ويبيعها، وبعد كده يحاول يشتريها تاني بسعر أقل، ويرجع الأسهم لصاحبها، ويستفيد من فرق السعر. لكن خلي بالك، لو السهم سعره ارتفع بدل ما ينخفض، المستثمر ممكن يتعرض لخسارة.

القواعد الجديدة حددت ضوابط للإقراض، منها أن الأسهم المتاحة للإقراض ما تتجاوزش 40% من الأسهم حرة التداول للشركة، واقتراض العميل والأطراف المرتبطة بيه ما يزيدش على 2%.

وفيه كمان حد أقصى 5% للعقود المباشرة وفقًا للقواعد المنظمة. التجارب الحالية بتختبر الربط الإلكتروني بين مصر للمقاصة وشركات السمسرة المرخصة، مع متابعة العمليات والضمانات، بهدف تعزيز الشفافية وحماية المستثمرين، قبل بدء التطبيق الرسمي للآلية في السوق.