قانون جديد للعقارات.. فلوسك هتتحمي إزاي قبل ما تشتري شقة؟
الحكومة بتستعد لإقرار مشروع قانون جديد لتنظيم السوق العقاري، والهدف إنه يحمي حقوق المشترين وينظم شغل المطورين العقاريين.
إيه الجديد؟.. القانون المقترح بيلزم كل مطور يفتح حساب بنكي مستقل لكل مشروع أو مرحلة، علشان فلوس المشترين تبقى منفصلة، ومصروفات المشروع تكون واضحة وتحت المتابعة.
كمان المطور لازم يوفر غطاء مالي قبل طرح الوحدات للبيع، بنسبة بتختلف حسب حجم المشروع، وده علشان يبقى فيه ضمان مالي يساعد على تنفيذ الالتزامات.
وفيه كمان احتياطي مالي بنسبة 5% من إجمالي التحصيلات، لمواجهة طلبات استرداد الفلوس، مع تقديم تقارير مالية كل 6 شهور.
أما لو التسليم اتأخر، فالمشروع بيدي مهلة تصل لـ12 شهرًا وفق ضوابط محددة، ولو التأخير عدى 24 شهرًا، يحق للمشتري الاختيار بين الانتظار أو استرداد المبالغ اللي دفعها، وفق الآلية المقترحة. لكن مهم نعرف أن دي لسه مسودة قانون، ولازم تستكمل الإجراءات التشريعية قبل إقرارها رسميًا.
