سكن لكل المصريين 9.. خد بالك 6 حالات ممكن تفسخ عقد شقتك من غير إنذار
لو مقدم على شقة في «سكن لكل المصريين 9».. خد بالك، لأن فيه 6 حالات ممكن بسببها عقد الوحدة يتفسخ من غير إنذار.
أول حالة.. لو استخدمت الشقة في نشاط مخالف للغرض المخصص ليها، يعني الوحدة السكنية تتحول لنشاط تجاري أو إداري من غير موافقة.
تاني حالة.. التصرف في الشقة للغير، سواء بالبيع أو التنازل أو بأي طريقة تخالف شروط التعاقد.
تالت حالة.. تأجير الوحدة من الباطن بالمخالفة للقواعد المحددة للمشروع.
رابع حالة.. لو ثبت إن فيه تغيير في طبيعة استخدام الوحدة أو إجراء تعديلات تخالف الشروط المتفق عليها.
خامس حالة.. عدم الالتزام بسداد المستحقات والأقساط في المواعيد والقواعد المحددة، بما يترتب عليه اتخاذ الإجراءات القانونية المنصوص عليها.
وسادس حالة.. تقديم بيانات أو مستندات غير صحيحة وقت التقديم أو التعاقد، خصوصًا لو كانت البيانات دي أثرت على استحقاقك للوحدة.
والنقطة المهمة هنا إن مخالفة شروط التعاقد ممكن تعرضك لفسخ العقد وسحب الوحدة وفقًا للقواعد المنظمة للمشروع.
يعني قبل ما تستلم شقتك أو تتصرف فيها بأي شكل.. راجع شروط التعاقد كويس جدًا، لأن الغلطة ممكن تكلفك الوحدة نفسها.
