سباق جديد بين البنوك على فلوس الكبار.. خدمات ومزايا ضخمة لأصحاب الملايين
يا ترى إيه اللي مخلي البنوك المصرية تدخل سباق قوي على فلوس كبار العملاء.. وليه أصحاب الملايين بقوا هدف أساسي للبنوك في الفترة الأخيرة.. وهل المنافسة بينهم بقت على أعلى فايدة بس ولا اللعبة اتغيرت وبقت على الخدمة وإدارة الثروات كمان؟
البنوك المصرية كثفت مؤخرا المنافسة على استقطاب كبار العملاء والحفاظ على ودائعهم.. وده من خلال مجموعة كبيرة من الحوافز والمنتجات المصرفية اللي هدفها جذب مدخرات جديدة وتأمين مصادر مستقرة للتمويل.
المنافسة مش بتقف عند العائد على الشهادات والودائع.. لكن البنوك بدأت تقدم إعفاءات وخصومات على الرسوم.. ومدير علاقات مخصص.. وأولوية في الفروع ومراكز الاتصال.. بالإضافة لخدمات استثمار وتمويل وبطاقات ائتمانية بمزايا أكبر.
والسبب إن سعر العائد مبقاش العامل الوحيد اللي بيحسم قرار صاحب الثروة.. لأن العميل الكبير ممكن يوزع أمواله بين أكتر من بنك وبين أدوات استثمار مختلفة.. وبالتالي البنك اللي عايز يحتفظ بيه لازم يقدم له علاقة مصرفية متكاملة.
وعشان كده بنوك زي الأهلي المصري وCIB وQNB مصر وبنك مصر والإمارات دبي الوطني وبنك أبوظبي الأول وبنك القاهرة وغيرها.. طورت برامج مخصصة لإدارة الثروات ورفعت مستوى الخدمات المقدمة للعملاء أصحاب الأرصدة الكبيرة.
والشرائح بتبدأ في بعض البنوك من مليون جنيه.. وبتوصل في الشرائح الأعلى لأكتر من 20 و30 مليون جنيه.. وكل ما الرصيد يزيد بتزيد المزايا والخدمات المقدمة للعميل.
لكن البنوك مش بتدفع كل الحوافز دي لمجرد الحفاظ على الودائع.. لأن كبار العملاء بيمثلوا فرصة لزيادة الإيرادات من العمولات والأتعاب من خدمات الاستثمار والتمويل وإدارة الثروات.
وبالتالي المنافسة الحقيقية دلوقتي مش بس مين هيدي فايدة أعلى.. لكن مين هيقدر يمسك العميل الكبير ويخليه يحط فلوسه ويستثمر ويتعامل مع البنك في أكبر عدد ممكن من الخدمات.
