بعد موجة من المكاسب في الأيام الأخيرة.. سر تراحع الدولار في البنوك

الدولار بيرجع يتراجع تاني في مصر.. فإيه اللي حصل للجنيه خلاه يستعيد جزء من قوته؟ وهل الأموال الساخنة رجعت بقوة للسوق؟ وإيه اللي ممكن يحصل لسعر الدولار لو التدفقات دي استمرت؟

خلال تعاملات يوم الأربعاء.. الدولار تراجع في البنوك بعد ما كان حقق مكاسب خلال الأيام اللي فاتت.. والسبب الرئيسي هو تحسن تدفقات الأموال الساخنة على أدوات الدين المصرية..

أعلى سعر للدولار سجل 52 جنيه و10 قروش للشراء و52 جنيه و20 قرش للبيع في بنك أبوظبي الإسلامي..

وفي المقابل.. أقل سعر وصل لـ51 جنيه و85 قرش للشراء و51 جنيه و95 قرش للبيع في بنك أبوظبي الأول وبنك HSBC..

لكن السؤال الأهم.. إيه اللي بيحصل في سوق الدين؟

بيانات البورصة المصرية كشفت إن تعاملات العرب والأجانب في السوق الثانوية لأدوات الدين الحكومي سجلت صافي شراء بقيمة 136.6 مليون دولار خلال تعاملات يوم الثلاثاء.

واللافت إن العرب لوحدهم سجلوا صافي شراء بـ380.7 مليون دولار.. مقابل صافي بيع من الأجانب بقيمة 244.1 مليون دولار

والصورة الأوسع بتوضح إن التدفقات الإيجابية مستمرة.. فسجلت الأموال الساخنة صافي شراء بـ93 مليون دولار يوم الاثنين.. وارتفعت لـ1.4 مليار دولار خلال الأسبوع الماضي.

وده مهم لأن دخول الدولار للاستثمار في أدوات الدين بيزود المعروض من العملة الأجنبية داخل السوق.. وبالتالي بيدعم الجنيه وبيضغط على سعر الدولار.

لكن التدفقات دي مش مستقرة طول الوقت.. خصوصا إن السوق شهد قبل كده موجة تخارج.. سجلت خلالها تعاملات العرب والأجانب صافي بيع بـ513 مليون دولار خلال الأسبوع قبل الماضي

يعني تراجع الدولار حاليا مرتبط بشكل واضح بعودة التدفقات الأجنبية والعربية لأدوات الدين.. واستمرار الاتجاه ده هيكون عامل مهم في حركة سعر الدولار خلال الفترة الجاية.