مصر رايحة للأسمدة الحيوية.. تكلفة أقل وصادرات أعلى

مصر رايحة في اتجاه جديد في الزراعة.. الأسمدة الحيوية بدل جزء من الأسمدة الكيماوية، والهدف: تكلفة أقل وصادرات زراعية أقوى

تقرير لمعهد بحوث الاقتصاد الزراعي كشف إن التوسع في استخدام الأسمدة الحيوية ممكن يقلل استخدام الأسمدة النيتروجينية المعدنية بنسبة تتراوح بين 20 و30%، بمتوسط حوالي 24%.

وده معناه توفير مباشر للمزارع..

الدراسات أشارت لوفر مالي ممكن يوصل في المتوسط لحوالي 5367 جنيه للفدان، ويوصل لـ7200 جنيه في زراعة العنب، و6900 جنيه للفراولة.

لكن الحكاية مش توفير فلوس وبس..

استخدام الأسمدة الحيوية ساهم كمان في خفض البصمة الكربونية للتسميد بنسبة وصلت لـ30%، مع تحسين كفاءة استخدام النيتروجين.

وده مهم جدًا مع تشدد الأسواق العالمية في الاشتراطات البيئية الخاصة بالمنتجات الزراعية.

ومصر بالفعل عندها صادرات زراعية كبيرة؛ إذ وصلت الصادرات من المحاصيل الطازجة والمجففة لنحو 6.2 مليون طن، بحسب بيانات وزارة الزراعة.

فالفكرة إن المنتج المصري يبقى أقل تكلفة في إنتاجه، وفي نفس الوقت أكثر توافقًا مع متطلبات الأسواق الخارجية.

وعشان كده التقرير بيوصي بالتوسع تدريجيًا في الأسمدة الحيوية، والبدء بمحاصيل زي الفراولة والبصل والثوم، ثم البطاطس، مع برامج أكثر دقة للعنب والموالح.

يعني مصر مش بس عايزة تنتج أكتر.. لكن تنتج بتكلفة أقل، وبطريقة تساعد محصولها يدخل أسواق تصدير بتطلب زراعة أكثر استدامة.