من الجولف لصن كابيتال.. الأتوبيس الترددي يوسّع طريقه في القاهرة سبتمبر الجاي

الأتوبيس الترددي السريع على الطريق الدائري بيكبر خطوة جديدة.. والمرحلة التانية هتبدأ التشغيل خلال شهر سبتمبر.

المسار الجديد هيمتد من منطقة الجولف، مرورًا بالمعادي والأوتوستراد والمريوطية والمنصورية، لحد محطة "صن كابيتال" عند طريق القاهرة - الفيوم الصحراوي.

والمرحلة دي هتضم 16 محطة رئيسية، عشان تربط مناطق كتير في القاهرة الكبرى بشبكة نقل جماعي أسرع وأسهل، خصوصًا مع تخصيص مسار للأتوبيسات بعيد عن زحمة العربيات.

والجديد كمان إن مع انطلاق المرحلة التانية، هيدخل الخدمة 20 أتوبيس كهربائي جديد مصري الصنع، على أن يزيد العدد تدريجيًا لحد 320 أتوبيس ترددي ضمن العقد الكامل.

يعني لو بتتحرك يوميًا على الدائري بين شرق القاهرة والجيزة.. قدامك وسيلة نقل جديدة ممكن توفر وقت ومجهود كبير.

والأتوبيس الترددي جزء من شبكة مخطط يوصل طولها لـ116 كيلومتر، عشان تربط مناطق القاهرة الكبرى والمدن الجديدة بشبكة نقل جماعي متكاملة.