مصر بتغزو الأسواق.. الموالح والبطاطس يقودوا صادراتنا الزراعية لأكتر من 6.8 مليون طن
مصر مش بس بتزرع علشان السوق المحلي.. المحاصيل المصرية بقت بتنافس بقوة في الأسواق العالمية، والأرقام الأخيرة بتكشف حجم الطفرة.
إجمالي الصادرات الزراعية المصرية وصل لنحو 6.8 مليون طن من بداية السنة لحد دلوقتي، وده رقم كبير بيأكد إن المنتجات الزراعية المصرية بقى ليها حضور قوي بره.
والصدارة راحت للموالح بأنواعها، بإجمالي صادرات وصل لـ2.3 مليون طن، يعني لوحدها بتشكل جزء ضخم من إجمالي الصادرات الزراعية.
أما المركز التاني فكان من نصيب البطاطس الطازجة، اللي سجلت حوالي 929 ألف طن، وبعدها البطاطا بـ280 ألف طن.
والقائمة كمان ضمت العنب بـ189 ألف طن، والبصل الطازج بحوالي 183 ألف طن، والفاصوليا الطازجة والجافة بـ150 ألف طن.
ومش بس كده.. مصر بتشتغل على فتح أسواق جديدة قدام المحاصيل دي، خصوصًا في أفريقيا وآسيا وأمريكا اللاتينية، مع تطبيق منظومة التكويد والتتبع للمزارع التصديرية عشان تضمن جودة وسلامة المنتج من المزرعة لحد المستهلك.
وخلال النصف الأول من السنة، مصر نجحت كمان في فتح 21 سوق جديدة أمام صادراتها الزراعية.
يعني المعركة دلوقتي مش بس إننا ننتج أكتر.. لكن إننا نصدر أكتر، ونوصل للعميل العالمي بمنتج مصري قادر ينافس.
فهل الصادرات الزراعية المصرية تكسر أرقام أكبر قبل نهاية السنة؟
