هتخلصها من البيت.. منظومة جديدة للتحقق من الهوية والتوقيع الإلكتروني عبر الموبايل
وداعًا للذهاب لفروع الاتصالات تخيل تقدر تثبت هويتك وتعمل توقيع إلكتروني من الموبايل، من غير ما تنزل فرع شركة الاتصالات!
وزارة الاتصالات، بالتعاون مع وزارة الداخلية، أطلقت منظومة جديدة للتحقق البيومتري والتوقيع الإلكتروني، ضمن خطة الدولة للتوسع في التحول الرقمي وتعزيز الأمان الرقمي.
يعني إيه الكلام ده؟.. المنظومة الجديدة هتسمح بتقديم خدمات محتاجة التأكد من هوية المستخدم، وكمان التوقيع الإلكتروني، من خلال تطبيقات شركات الاتصالات على الموبايلات الذكية.
والأهم أن العملية دي ممكن تتم عن بُعد، يعني مش هتحتاج تروح بنفسك لفرع الشركة علشان تخلص الإجراءات.
المنظومة اتطورت بالتعاون بين الجهاز القومي لتنظيم الاتصالات، وهيئة «إيتيدا»، وشركات متخصصة في الحلول الرقمية، وشركات التوقيع الإلكتروني المرخصة.
والهدف الأساسي هو حماية بيانات المواطنين، وتسهيل الوصول للخدمات، وتقليل الإجراءات التقليدية.
