خصومات لحد 30%.. كل اللي محتاج تعرفه قبل ما تروح "أهلا مدارس 2026"
لو عندك أولاد في المدارس، فقبل ما تبدأ تشتري شنط وكراريس وملابس وأدوات مدرسية.. استنى شوية، لأن معرض "أهلا مدارس 2026" راجع بتخفيضات ممكن توفر عليك جزء كبير من مصاريف التجهيز للعام الدراسي الجديد.
المعرض الرئيسي مقرر افتتاحه مع بداية سبتمبر، قبل انطلاق الدراسة يوم 12 سبتمبر، ومكانه في صالة جهاز تنمية المشروعات بأرض المعارض في مدينة نصر.
أما التخفيضات، فبتوصل إلى 30% مقارنة بأسعار السوق الحر، مع مشاركة مصنعين ومنتجين وتوفير المنتجات من المصنع للمستهلك مباشرة من غير وسطاء.
طيب هتلاقي إيه هناك؟
هتلاقي كل الأساسيات تقريبًا.. من الكشاكيل والكراريس والأقلام وأدوات الرسم والهندسة، لحد الزي المدرسي والأحذية والشنط بمقاسات وأشكال مختلفة.
ومش بس كده.. المعرض هيضم كمان أجهزة إلكترونية زي أجهزة الحاسب والتابلت واللابتوب ومستلزماتها، بالإضافة لسلع غذائية مناسبة
للوجبات المدرسية واللانش بوكس
ولو مش في القاهرة، فالموضوع مش مقتصر على معرض مدينة نصر؛ فيه معارض فرعية في المحافظات والمراكز، وكمان عربيات ومنافذ متحركة عشان توصل المستلزمات للمناطق المختلفة.
يعني قبل ما تنزل تشتري كل حاجة من أي مكان.. اعرف الأول أقرب معرض "أهلا مدارس" ليك، وشوف هل تقدر تستفيد من التخفيضات وتوفر في ميزانية المدارس.
