رهان السيسي الكسبان.. سر استمرار حسن عبد الله في منصبه
يا ترى ليه الرئيس السيسي جدد الثقة في حسن عبدالله محافظ البنك المركزي لمدة سنة جديدة؟.. هل الموضوع مجرد تجديد منصب؟ ولا فيه رسالة أكبر بكتير؟ وايه الانجازات اللي حققها حسن عبدالله في الفترة اللي فاتت ؟
حسن عبدالله تولى المسؤولية في وقت كان الدولار فيه عامل أزمة حقيقية للاقتصاد المصري.. سوق موازية... وفرق كبير في أسعار الدولار... وضغط مستمر على الجنيه...والجنيه كان كل يوم تقريبًا بيخسر أرض جديدة قدام الدولار.
لكن المعادلة بدأت تتغير. البنك المركزي اشتغل على إعادة الانضباط لسوق الصرف، ومع الوقت اختفت الفجوة الكبيرة بين السعر الرسمي والسوق الموازية، ورجعت البنوك تلعب دورها الطبيعي في توفير العملة الأجنبية.
النجاح الحقيقي لحسن عبدالله في معركة الدولار كان في حاجة أهم... إن السوق الموازية ما تبقاش هي اللي بتحدد سعر الدولار. وإن المواطن والمستثمر يرجعوا يتعاملوا مع سعر صرف أكثر انضباطًا ووضوحًا.
والنتيجة كانت احتياطي نقدي وصل لمستويات تاريخية، وتحسن قدرة الجهاز المصرفي على التعامل مع احتياجات السوق.
وعشان كده، تجديد الثقة في حسن عبدالله مش مجرد قرار إداري.
ده أقرب لرهان على استكمال نفس المسار بدل تغيير القيادة في وقت لسه فيه ملفات صعبة محتاجة شغل زي الدولار... والتضخم... والاحتياطي...
التدفقات الدولارية... وسعر الفائدة. وكل ملف فيهم مرتبط بالملف التاني.
