محدش هيشتري آيفون تاني.. آبل هتطرح موبايلات بالإيجار

تخيل تشتري آيفون... من غير ما تدفع تمنه كامل وتفضل تدفع مبلغ كل شهر مقابل استخدامه... ولما ينزل موديل أحدث، ترجعه وتاخد الجديد.

ده مش سيناريو خيالي... ده نموذج جديد بدأت أبل تختبره، وممكن يغير طريقة تعاملنا مع الأجهزة الذكية تمامًا.

الفكرة ببساطة إنك بدل ما تشتري الجهاز وتملكه من أول يوم، تدخل في اشتراك شهري وتستخدم الجهاز لفترة محددة.

والبرنامج، اللي اسمه Apple Upgrade، مش مقتصر على الآيفون بس. ده ممكن يشمل كمان الآيباد، والماك، وساعة أبل الذكية.

والاشتراك الشهري هيتراوح بين 11 دولار و24 دولار، حسب نوع الجهاز والخطة اللي هتختارها.

لكن المفاجأة الحقيقية بتحصل في نهاية الاشتراك...زقدامك 3 اختيارات.

إما ترجع الجهاز لأبل، أو تعمل ترقية وتاخد إصدار أحدث، أو تدفع مبلغ إضافي وتشتري الجهاز بشكل نهائي.

طيب... ليه أبل بتفكر بالطريقة دي؟

الشركة بتتحرك في وقت صناعة الإلكترونيات نفسها بتواجه ضغوط بسبب ارتفاع تكاليف الإنتاج، خصوصًا أسعار الرقائق الإلكترونية وشرائح الذاكرة، وده ممكن يضغط على أسعار الأجهزة الجديدة.

وفي نفس الوقت، الاشتراكات بتدي أبل مصدر دخل متكرر وثابت، بدل ما تعتمد بشكل أساسي على إن العميل يشتري جهاز جديد كل كام سنة.

لكن لو النموذج ده نجح، الموضوع ممكن يكون أكبر من مجرد طريقة جديدة لشراء الآيفون.

لأننا ممكن نكون قدام تغيير في فكرة امتلاك الأجهزة نفسها...

يعني بدل ما تقول: أنا اشتريت آيفون جديد، ممكن مستقبلًا تقول: أنا مشترك في آيفون.

والأخطر إن نجاح التجربة ممكن يشجع شركات تكنولوجيا تانية تعمل نفس الفكرة.

ساعتها الموبايل والكمبيوتر والساعة الذكية ممكن يتحولوا من منتجات بتشتريها مرة واحدة... لخدمات بتدفع عليها كل شهر.