طفرة سياحية جديدة.. "صن رايز" هتزود 7000 غرفة فندقية باستثمارات 700 مليون دولار
ليه صن رايز قررت تستثمر 700 مليون دولار دلوقتي؟، وهل مصر فعلًا محتاجة 7000 غرفة فندقية جديدة؟، وليه مرسى علم وشرم الشيخ واخدين النصيب الأكبر من التوسعات؟، والتوسع ده هيخلق كام فرصة عمل؟، وهل زيادة الفنادق معناها زيادة في عدد السائحين؟، وليه الشركة بتلجأ لتمويل بنكي رغم ضخامة استثماراتها؟.
لو حد قالك إن شركة مصرية هتستثمر 700 مليون دولار في الفنادق خلال أربع سنين، أكيد أول سؤال هيجي في بالك، هو ليه دلوقتي؟
كل المؤشرات بتقول إن السياحة في مصر داخلة على مرحلة نمو كبيرة، واللي هيكون عنده غرف أكتر وخدمة أفضل، هيكون هو المستفيد الأكبر.
مجموعة "صن رايز" أعلنت إنها ناوية تضيف حوالي 7000 غرفة فندقية جديدة باستثمارات ضخمة توصل لـ700 مليون دولار، وده رقم كبير جدًا، خصوصًا إنه بيأكد أن الشركات شايفة إن السوق المصري لسه فيه فرص أكبر بكتير.
لكن التوسع ده مش هيتم مرة واحدة، الشركة هتبدأ خلال الفترة الحالية بافتتاح 5 فنادق جديدة، منهم فنادق في مكادي ومرسى علم وشرم الشيخ، وهيضيفوا حوالي ألفي غرفة جديدة، وبعدها في السنة اللي بعدها، فيه 5 فنادق كمان هيتفتحوا في مرسى علم وشرم الشيخ والقاهرة، وده معناه أن الطاقة الفندقية في مصر هتزيد بشكل واضح.
لكن السؤال.. ليه المناطق دي بالتحديد؟، لأن البحر الأحمر وجنوب سيناء من أكتر المناطق اللي عليها طلب من السائحين، سواء من أوروبا أو الدول العربية، وكمان القاهرة بقت نقطة جذب قوية مع زيادة سياحة الأعمال والسياحة الثقافية.
اللافت كمان أن الشركة بتتفاوض مع بنوك مصرية للحصول على تمويل يقرب من 8 مليارات جنيه، علشان تطور فنادقها الحالية، وده معناه أن الخطة مش مجرد بناء جديد، لكن كمان تحديث وتطوير الموجود بالفعل، وده مهم جدًا، لأن المنافسة في السياحة مبقتش بعدد الفنادق فقط، لكن بجودة الخدمة ومستوى التجهيزات.
صن رايز أصلًا عندها محفظة كبيرة، بتدير حوالي 20 منتجع سياحي، بالإضافة لمراكب نيلية بين الأقصر وأسوان، يعني عندها خبرة كبيرة في السوق.. والتوسعات دي جاية متوافقة مع خطة الدولة، اللي بتستهدف إضافة مئات الآلاف من الغرف الفندقية الجديدة بحلول 2031، علشان تستوعب الزيادة المتوقعة في أعداد السائحين.
كل غرفة فندقية جديدة مش معناها مكان إقامة وبس، دي معناها فرص عمل في الفنادق، والمطاعم، وشركات السياحة، والنقل، والخدمات، وحتى الصناعات اللي بتورد للفنادق، يعني التأثير الاقتصادي أكبر بكتير من مجرد بناء مبنى جديد.
ولو استمرت السياحة بنفس معدلات النمو الحالية، فممكن نشوف شركات تانية تدخل باستثمارات مشابهة، وده هيزود المنافسة ويحسن مستوى الخدمات في السوق كله.
من الآخر، استثمار بـ700 مليون دولار وإنشاء 7000 غرفة جديدة مش مجرد توسع لشركة، لكنه رسالة واضحة أن المستثمرين شايفين إن مستقبل السياحة في مصر واعد، وإن القطاع لسه قدامه فرص نمو كبيرة جدًا خلال السنوات الجاية.
