مصر بتبني قلعة صناعية جديدة.. مجمع متكامل في الزعفرانة باستثمارات مليار دولار

ليه مصر قررت تصنع الألواح الشمسية محليًا؟، وإيه أهمية خام الكوارتز في المشروع؟، وهل المشروع هيقلل استيراد الألواح من الخارج؟، وليه الزعفرانة اتاختارت للمجمع الصناعي؟، والمشروع هيوفر كام فرصة عمل؟، وهل مصر ممكن تبقى دولة مصدرة للألواح الشمسية؟.. 

يمكن أول ما تسمع أن مصر هتبني مجمع لإنتاج الألواح الشمسية بمليار دولار، تفتكر إنه مجرد مصنع جديد، لكن الحقيقة أن المشروع ده أكبر بكتير من كده.

الحكومة بتخطط لإنشاء مجمع صناعي متكامل في الزعفرانة على مساحة 917 فدان، بالشراكة مع القطاع الخاص، والهدف إنه يبدأ من استخراج خام الكوارتز المصري، ويوصل في الآخر لتصنيع الألواح الشمسية الجاهزة.

يعني بدل ما نصدر خام ونستورد منتج جاهز، هنصنعه هنا في مصر، ودي نقطة مهمة جدًا، لأن الكوارتز المصري من أجود الأنواع، وبيعتبر المادة الأساسية في صناعة الخلايا والألواح الشمسية، وبالتالي وجود الخام محليًا بيدي مصر ميزة قوية جدًا.

الحكومة هتدخل بالأرض، بينما المستثمر هيقوم بالتمويل والبناء والتشغيل، وده جزء من خطة الدولة لزيادة مشاركة القطاع الخاص في المشروعات الكبرى.

لكن السؤال.. ليه المشروع ده مهم دلوقتي؟، لأن مصر بتتوسع بسرعة في إنشاء محطات الطاقة الشمسية، وبالتالي الطلب على الألواح بيزيد سنة بعد سنة، واستيرادها بيكلف الدولة عملة صعبة.. لما الألواح تتصنع محليًا، تكلفة الاستيراد هتقل، ونسبة المكون المحلي هتزيد، وهيبقى عندنا صناعة كاملة بدل الاعتماد على الخارج.

الموضوع كمان مش هيقف عند الألواح فقط، لأن أي مصنع بالحجم ده هيخلق صناعات مغذية، وهيحتاج شركات للنقل والتعبئة والصيانة والخدمات، وده معناه فرص عمل جديدة واستثمارات إضافية.

وكمان لو الإنتاج زاد عن احتياجات السوق المحلي، يبقى عندنا فرصة نصدر الألواح الشمسية لدول تانية، خصوصًا أن العالم كله دلوقتي بيتجه للطاقة النظيفة.

المشروع كمان بيدعم خطة مصر للتحول لمركز إقليمي للطاقة المتجددة، ويخلي البلد مش مجرد مستخدم للطاقة الشمسية، لكن كمان مصنع ومصدر لمكوناتها.

من الآخر، مشروع الزعفرانة مش مجرد استثمار بمليار دولار، لكنه بداية لصناعة جديدة تعتمد على خامات مصر، وتوفر عملة صعبة، وتخلق وظائف، وتدعم الاقتصاد، وتخلي مصر تدخل بقوة في سوق الطاقة النظيفة العالمي، ودي خطوة ممكن تغير شكل الصناعة المصرية خلال السنوات الجاية لو تم تنفيذها بالشكل المخطط ليه.