قبل ما تحجز أرضك.. اعرف الأوراق المطلوبة وشروط القبول في "مسكن 2026"
لو ناوي تحجز قطعة أرض في مشروع مسكن 2026.. استنى دقيقة، لأن فيه أوراق لازم تجهزها قبل ما تبدأ التقديم.
أول حاجة هتحتاجها هي صورة بطاقة الرقم القومي ليك، ولو متزوج لازم ترفع كمان صورة بطاقة الزوج أو الزوجة.
ولو عندك أولاد قُصر، هيكون مطلوب شهادات ميلادهم ضمن ملف التقديم.
بعد كده، لازم ترفع إيصال سداد جدية الحجز ومصاريف دراسة الطلب، لأن من غيرهم مش هيتم استكمال الإجراءات.
والمستندات كلها بتترفع في ملف PDF واحد بالحجم المحدد على منصة "مسكن".
لكن الأوراق لوحدها مش كفاية... فيه شروط لازم تكون مستوفيها.
لازم تكون مصري الجنسية، وسنك 21 سنة أو أكتر وقت التقديم.
كمان، الأسرة كلها من حقها تحجز قطعة أرض واحدة فقط، وما ينفعش يكون سبق تخصيص قطعة أرض ليك أو لزوجتك أو لأسرتك ضمن الطروحات السابقة لبرنامج "مسكن".
ولو الزوج والزوجة قدموا على أكتر من قطعة، بيتم إلغاء الطلبين.
ولو كنت من ذوي الهمم، لازم ترفق كارت الخدمات المتكاملة، لأنه مستند أساسي، وعدم رفعه يؤدي إلى إلغاء الطلب.
ولو كل الشروط والأوراق جاهزة، يبقى تقدر تدخل على منصة "مسكن"، ترفع المستندات، وتسدد جدية الحجز، وتتابع موقف طلبك إلكترونيًا.
جهز ورقك كويس.. لأن أي مستند ناقص أو بيانات غير صحيحة ممكن تضيع عليك فرصة حجز الأرض.
