بتبدأ من 788 ألف جنيه.. انطلاق 4 عربيات جديدة من نيسان في السوق المصري
بتبدأ من 788 ألف جنيه.. لو بتدور على عربية جديدة SUV مدمجة واقتصادية في استهلاك البنزين يبقى الخبر ده ليك
شركة نيسان مصر أعلنت رسميا عن طرح العربية نيسان ماجنيت المجمعة محليًا بنسبة مكون محلي بتتعدى 55%، وده بعد انطلاق إنتاجها داخل مصنع الشركة بمدينة السادس من أكتوبر.
العربية نازلة بـ 4 فئات بتبدأ من 788 ألف جنيه للفئة الأولى، و848 ألف للفئة الثانية، و868 ألف للفئة الثالثة، وبتوصل لـ 888 ألف جنيه للفئة الرابعة والأعلى وبتعتمد على محرك 3 سلندر سعة 1000 سي سي تيربو بقوة 99 حصان مع فتيس أوتوماتيك CVT وبمعدل استهلاك بنزين موفر جدا بيوصل لـ 17.9 كيلو لكل لتر.
ده غير إنها بتيجي بأبعاد مناسبة جدا للزحمة مع ارتفاع عن الأرض 205 مم، وتجهيزات أمان قوية بتشمل 6 وسائد هوائية، ونظام ثبات إلكتروني ESP، وفرامل ABS وEBD، مع شاشة معلومات 7 بوصة وجنوط رياضية 16 بوصة وتصميم عصري بشبكة أمامية ومصابيح LED.
