اكتشاف هيقلب الموازين في سوق الطاقة.. مصر تكتشف حقل غاز جديد وبدء الانتاج الفعلي

يا ترى ايه حكاية حقل الغاز الجديد اللي مصر اكتشفته وهيزود الإنتاج المحلي، وليه الحقل الجديد بدأ يضخ 40 مليون قدم مكعبة يوميا من أول تشغيل؟ وإزاي تنفيذ خط إنتاج بطول 10 كيلومترات سرع دخول الكشف على خريطة الإنتاج؟

في الوقت اللي ناس كتير كانت بتسأل هل مصر تقدر تزود إنتاجها من الغاز من جديد وهل الاكتشافات الجديدة مجرد أخبار ولا هتتحول لإنتاج فعلي وهل السوق المحلي هيستفيد بسرعة ولا هتستغرق العملية شهور طويلة جت الإجابة بشكل عملي مع إعلان كشف جديد بدأ بالفعل يضيف إنتاج جديد على أرض الواقع ويفتح باب مهم قدام زيادة الإمدادات المحلية.

طب إيه حكاية الكشف الجديد وليه بيتوصف إنه خطوة مهمة؟

الكشف اتحقق من خلال حفر بئر واتدا الاستكشافية العميقة في الصحراء الغربية ووصلت أعمال الحفر لعمق 15000 قدم وهو عمق بيعكس حجم المجهود الفني المطلوب للوصول إلى الطبقات الحاملة للغاز والأهم من كده إن النتائج ماوقفتش عند مجرد مؤشرات أو توقعات لكن اتأكد وجود الغاز بعد انتهاء أعمال الحفر وإجراء الاختبارات النهائية وده معناه إن الكشف انتقل بسرعة من مرحلة البحث إلى مرحلة الإنتاج الفعلي.

و هو حجم الإنتاج قد إيه وهل يستحق كل الاهتمام ده؟

البئر الجديدة سجلت معدل إنتاج 40 مليون قدم مكعبة من الغاز يوميا وهو رقم بيعكس قدرة البئر على ضخ كميات جديدة تدعم الإنتاج المحلي ووجود إنتاج بالمعدل ده من أول التشغيل بيدي مؤشر على الإمكانات الواعدة للكشف وبيأكد إن أعمال الاستكشاف نجحت في الوصول إلى منطقة غنية بالغاز يمكن الاستفادة منها بشكل مباشر.

طيب إزاي اتأكدوا من وجود الغاز قبل بدء الإنتاج؟

هنا بييجي دور التسجيلات الكهربائية اللي أظهرت مؤشرات إيجابية أكدت وجود تراكيب حاملة للغاز وبعدها مباشرة تم تنفيذ اختبارات الإنتاج النهائية عقب الانتهاء من أعمال الحفر والنتيجة كانت واضحة وهي تحقيق معدل إنتاج يومي وصل إلى 40 مليون قدم مكعبة وده بيدي درجة كبيرة من الثقة في نتائج البئر ويعزز فرص الاعتماد عليها ضمن منظومة الإنتاج المحلي.

طب  مين اللي نفذ المشروع ده ؟

شركة خالدة للبترول هي اللي حققت الكشف وهي شركة مشتركة بين الهيئة المصرية العامة للبترول وشركة أباتشي العالمية ووجود شراكة بالشكل ده بيجمع بين الخبرات الفنية وإمكانيات التشغيل وبيساعد على تنفيذ أعمال الاستكشاف والإنتاج وفقا للخطط الموضوعة مع الاستفادة من البنية التحتية والخبرات المتاحة.

لكن هل استخراج الغاز وحده يكفي عشان يدخل الإنتاج بسرعة ؟

طبعا لا لأن أي كشف جديد محتاج شبكة تنقل الغاز من موقع البئر إلى البنية التحتية القائمة وعلشان كده تم بالتوازي مع أعمال الحفر تنفيذ خط إنتاج جديد بطول 10 كيلومترات باستثمارات وصلت إلى 2 3 مليون دولار والخط ده كان عنصر أساسي في تسريع نقل الإنتاج وربط البئر بالشبكات الموجودة بالفعل بدل ما يفضل الكشف منتظر تنفيذ أعمال إضافية بعد انتهاء الحفر.

طيب ليه تنفيذ الخط بالتوازي مع الحفر يعتبر نقطة مهمة؟

لأن الوقت في مشروعات الطاقة بيمثل عامل حاسم وكل يوم بيتم توفيره بين انتهاء الحفر وبدء الإنتاج بيكون له قيمة كبيرة وبالتالي تنفيذ خط الإنتاج في نفس توقيت أعمال الحفر ساعد على تقليل الفترة الزمنية المطلوبة لدخول البئر الخدمة وده بيتماشى مع خطة تسريع وضع الاكتشافات الجديدة على خريطة الإنتاج بأسرع وقت ممكن.