إزاي تدفع نصف تذكرة في أتوبيسات النقل العام؟ اعرف الطريقة ووفر في مشاويرك
لو بتركب أتوبيسات النقل العام بشكل يومي، دلوقتي تقدر توفر في تكلفة مشاويرك وتدفع على قد المسافة اللي هتركبها.
السر في كارت "طوالي"، وهو كارت دفع إلكتروني مسبق الشحن بيحسب قيمة الرحلة حسب عدد المحطات، بدل ما تدفع تذكرة كاملة كل مرة.
كل اللي عليك إنك تجيب الكارت من أحد منافذ البيع أو من الأتوبيسات المزودة بماكينات الدفع، وتشحنه من خلال تطبيق "طوالي" أو خدمة فوري أو البطاقات البنكية.
ولما تركب الأتوبيس، مرر الكارت على ماكينة الدفع عند الصعود، وكرره مرة تانية عند النزول، والنظام هيحسب قيمة الرحلة تلقائيًا حسب عدد المحطات اللي قطعتها.
الميزة الأكبر؟ لو مشوارك قصير، ممكن تستفيد من نصف التذكرة أو حتى ربع التذكرة بدل ما تدفع السعر الكامل، لكن ده متاح فقط لحاملي كارت الدفع المسبق.
لو بتركب النقل العام باستمرار، الكارت ده ممكن يوفر عليك مبلغ كويس كل شهر، خاصة لو معظم مشاويرك مسافات قصيرة.
