سباق ساخن بين البنوك على فلوس الأغنياء.. وشهادات بعوائد قياسية تظهر من جديد

إيه اللي بيحصل في البنوك المصرية دلوقتي؟ وليه بنوك كتير بدأت تطرح شهادات ادخار بعوائد توصل لـ19% و19.25% ؟وليه الشهادات دي مش لأي حد؟ وليه الحد الأدنى فيها بيوصل لـ5 ملايين جنيه؟ وهل البنوك بقت بتنافس على فلوس المليونيرات أكتر من أي وقت فات؟ والأهم هل الخطوة دي معناها إن السوق محتاج سيولة بشكل أكبر؟

خلال الفترة الأخيرة عدد من البنوك في مصر بدأ يطرح شهادات ادخار جديدة بعوائد مرتفعة لكن المرة دي الشهادات مش موجهة لكل العملاء زي المعتاد لكنها مخصصة لشريحة كبار العملاء وأصحاب الثروات والحد الأدنى للاكتتاب فيها بيتراوح بين مليون جنيه و5 ملايين جنيه وده بيكشف إن المنافسة بين البنوك دخلت مرحلة جديدة هدفها جذب أكبر حجم ممكن من السيولة من عدد محدود من العملاء.

الخطوة دي حصلت رغم إن البنك المركزي المصري ثبت أسعار الفائدة على الجنيه خلال 3 اجتماعات متتالية للجنة السياسة النقدية لتفضل عند 19% للإيداع و20% للإقراض وده معناه إن البنوك مش بترفع العوائد بسبب قرار جديد من المركزي لكن بسبب المنافسة بينها على جذب المدخرات وتأمين احتياجاتها من السيولة.

طيب ليه البنوك مركزة على كبار العملاء بالذات؟

السبب ببساطة إن العميل اللي عنده ملايين بيقدر يوفر للبنك سيولة كبيرة من خلال حساب واحد أو شهادة واحدة وده بيدي البنك مرونة أكبر في تمويل القروض والمشروعات بدل ما يعتمد على آلاف الحسابات الصغيرة اللي ممكن أصحابها يسحبوا فلوسهم في أي وقت.

كمان البنوك شايفة إن العميل الكبير مش بيجيب فلوسه ويحطها في شهادة وبس لكنه غالبا بيستخدم خدمات تانية زي إدارة الثروات والاستثمار والخدمات المصرفية الخاصة وده بيزود أرباح البنك سواء من العوائد أو من العمولات والخدمات المختلفة.

وفي سبب تاني مهم جدا وهو إن الطلب على القروض زاد سواء من الشركات أو الأفراد وفي نفس الوقت أدوات الدين الحكومية لسه بتقدم عوائد جذابة وده خلق ضغط على السيولة داخل البنوك وخلاها تدور على مصادر تمويل مستقرة حتى لو اضطرت تقدم عائد أعلى شوية.

ولو بصينا على الشهادات الجديدة هنلاقي إن بنك القاهرة طرح شهادات بريمو لمدة 3 سنوات بحد أدنى مليون جنيه وفيها شهادة بعائد ثابت 18.5% يصرف سنويا وشهادة تانية بعائد 17.5% يصرف كل 3 شهور وشهادة ثالثة بعائد شهري 17.25%.

أما بنك قناة السويس فطرح شهادة إنفينتي بعائد متغير حاليا 19% يصرف يوميا لكن الحد الأدنى فيها 5 ملايين جنيه وطرح كمان شهادة إيليت ستار بعائد ثابت 17.5% يصرف شهريا بنفس الحد الأدنى.

البنك المصري الخليجي دخل المنافسة هو كمان وطرح شهادة البريميوم لمدة 3 سنوات بعائد ثابت 17.25% يصرف كل شهر وبحد أدنى مليون جنيه بينما البنك التجاري الدولي طرح شهادة بريميوم بنفس المدة ونفس الحد الأدنى وبعائد 17.25% يصرف شهريا.

أما البنك العربي الأفريقي الدولي فاختار يقدم شهادة بعائد متغير مرتبط بسعر الفائدة في البنك المركزي والعائد الحالي فيها وصل إلى 19.25% سنويا وبتتصرف شهريا لكن لازم يكون الحد الأدنى مليون جنيه والشهادة مخصصة للأفراد الطبيعيين فقط.

وفي مصرف أبوظبي الإسلامي مصر فيه أكتر من منتج مخصص لعملاء الثروات بداية من صك الغنى الثلاثي بحد أدنى 2.5 مليون جنيه وعائد بيتراوح بين 17.5% و19% حسب طريقة صرف العائد وكمان صك الثروة الثلاثي بحد أدنى مليوني جنيه بعائد 16% والصك الماسي الثلاثي بحد أدنى مليون جنيه بعائد بيتراوح بين 14.2% و15.25%.

طيب هل العوائد العالية دي معناها إن البنوك بتخسر علشان تجذب العملاء؟

الحقيقة العكس تماما لأن البنوك بتشوف إن الحصول على ملايين الجنيهات من عدد قليل من العملاء ممكن يكون أقل تكلفة من إنها تقترض من بنوك تانية أو تلجأ لإصدار أدوات دين بتكلفة أعلى وخصوصا مع استمرار زيادة الطلب على التمويل.

كمان إدارة عدد محدود من الحسابات الكبيرة أسهل وأقل تكلفة من إدارة آلاف الحسابات الصغيرة وده بيخلي البنوك تحقق كفاءة تشغيلية أعلى وفي نفس الوقت تضمن وجود سيولة مستقرة تقدر تعتمد عليها في تمويل نشاطها خلال السنوات الجاية.